سعودی عرب نے آب زم زم کو ملک سے باہر لے جانے پر پابندی عائد کی

سرینگر//
سعودی ایوی ایشن حکام نے عازمین حج کے مقدس مہینے ذی الحج سے قبل آب زم زم کو اپنے چیک ان سامان میں لے جانے پر پابندی عائد کردی ہے۔
سعودی جنرل ایوی ایشن اتھارٹی نے نئے رہنما خطوط کا باضابطہ نوٹیفکیشن جاری کیا ہے، جس میں زائرین کو زمزم کے کنویں کا پانی واپس اپنے ملکوں میں لے جانے سے روک دیا گیا ہے۔
تمام ایئر لائنز کو پابند کیا گیا ہے کہ وہ اس بات کو یقینی بنائیں کہ جدہ یا مملکت سعودی عرب کے کسی بھی ہوائی اڈے سے سفر کرنے والے مسافروں میں سے کسی کے پاس آب زمزم سے بھری بوتلیں نہ ہوں۔نئے احکامات کی خلاف ورزی کی صورت میں ایئر لائنز کے خلاف کارروائی کی جائے گی۔
آب زمزم زمزم کے کنویں کا پانی ہے جو مسجد الحرام مکہ مکرمہ میں واقع ہے جو اسلامی تاریخ کے مطابق معجزانہ طور پر پانی کا پیدا کردہ ذریعہ ہے۔ اس پانی کی بڑی مذہبی اہمیت ہے اور لوگ اسے حج یا عمرہ کرنے کے بعد بڑی مقدار میں اپنے ملکوں کو واپس لے جاتے ہیں۔
اس دوران سعودی حکومت نے عازمین حج کے کورونا ٹیسٹ کیلئے۶ لیبارٹریز مختص کردیں۔
ایک میڈیا رپورٹ کے مطابق رواں برس عازمین حج کیلئے کورونا ٹیسٹ کرنے کی مجاز ۶لیبارٹریز کی فہرست جاری کر دی گئی ہے۔
سعودی سفارتخانے کے نوٹیفکیشن کے مطابق عازمین حج جو کسی بھی ائیرپورٹ سے مکہ یا مدینہ روانہ ہوں گے ان کیلئے لازم ہوگا کہ وہ صرف منتخب شدہ ۶ لیبارٹریز سے ہی کورونا ٹیسٹ اور اس کی رپورٹ جمع کروائیں۔
نوٹیفکیشن میں مزید کہا گیا ہے کسی اور لیبارٹری کا سرٹیفکیٹ کسی صورت قابل قبول نہیں ہوگا۔