’منگل سوترا کی باتوں سے بھاجپا کی گھبراہٹ عیاں ‘

سرینگر//
جموںکشمیر نیشنل کانفرنس کے نائب صدر ‘عمر عبداللہ نے پیر کے روز کہاکہ بی جے پی موجودہ حالات سے گھبرا ئی ہوئی ہے یہی وجہ ہے کہ منگل سوترا اور مسلم لیگ کی باتیں ہو رہی ہیں۔
این سی نائب صدر نے کہاکہ لوک سبھا انتخابات میں انڈیا الائنس کی جیت یقینی ہے ۔
ان باتوں کا اظہار عمر عبداللہ نے چرار شریف میں آستانہ عالیہ پر حاضری دینے کے بعد نامہ نگاروں سے بات چیت کے دوران کیا۔
ایک سوال کے جواب میں بی جے پی کی طرف سے مذہبی منافرت پھیلانے کوبدقسمتی سے تعبیر کرتے ہوئے عمر نے کہاکہ جب یہ لوگ حکومت میں ہوتے ہیں تو کہتے ہیں کہ ہم ۱۴۰کروڑ ہندوستانیوں کی ترجمانی کرتے ہیں جس میں مسلمان بھی شامل ہیں، لیکن جب الیکشن ہوتے ہیں تو نفرت پھیلانے کے بغیر ان لوگوں کو اور کچھ نہیں آتا ہے ۔
این سی نائب صدر نے کہاکہ الیکشن ضابطہ اخلاق میں صاف صاف الفاظ میں مذہبی منافرت پھیلانا ممنوع قرار دیا گیا ہے لیکن ظاہر سی بات ہے کہ بی جے پی والے موجودہ حالات سے گھبرائے ہوئے ہیں، یہی وجہ ہے کہ منگل سوتر اور مسلم لیگ کی باتیں ہورہی ہیں، یہاں تک کہ کل ایک بی جے پی وزیر نے کہہ ڈالا کہ مسلمان ہندؤں کی زمینوں پر قبضہ کرنے کی تیاری کررہے ہیں۔
ایک اور سوال کے جواب میں عمر عبداللہ نے کہا کہ ہم کسی سے گھبرائے ہوئے نہیں ہیں، اگر ہم کسی سے ڈرے ہوتے بی جے پی کیخلاف میدان نہیں ہوتے ، اگر ہم گھبرائے ہوتے تو ہم بھی دوسروں کی طرف بی جے پی کی ہاں میں ہاں ملا رہے ہوتے ، ہم یہاں بھر پور اندا زمیں بی جے پی اور اس کی پراکسیوں کیخلاف لڑ رہے ہیں۔