سجاد لون کی مظفر بیگ کے ساتھ ملاقات‘الیکشن کیلئے حمایت طلب

سرینگر//
جموںکشمیر پیپلز کانفرنس کے صدر سجاد غنی لون نے بارہمولہ لوک سبھا سیٹ کیلئے حمایت طلب کرنے کے لئے سابق وزیر اعلیٰ مظفر حسین بیگ کے ساتھ ملاقات کی۔
بتادیں کہ سجاد لون شمالی کشمیر کی بارہمولہ لوک سبھا سیٹ کے لئے پیپلز کانفرنس کے امید وار ہیں اور ان کا مقابلہ نیشنل کانفرنس کے نائب صدر اور سابق وزیر اعلیٰ عمر عبداللہ سے ہے ۔
سابق رکن پالیمان فیاض میر بھی اس سیٹ پر پی ڈی پی کی طرف سے قمست آزمائی کر رہے ہیں۔
لون نے بدھ کے روز’ایکس‘پر ایک پوسٹ میں کہا’’مظفر بیگ صاحب اور سفینہ بیگ صاحبہ کے ساتھ ملاقات باعث مسرت تھا‘‘۔انہوں نے کہا’’ظاہر سی بات ہے کہ ان کے ساتھ گفتگو کا محور الیکشن ہی تھا، میں نے زور دیا کہ ان کی حمایت حاصل کرنا میرا حق ہے ‘‘۔
پیپلز کانفرنس کے سربراہ نے’ایکس‘پر ایک تصویر بھی اپ لوڈ کی ہے جس میں بااثر شیعہ لیڈر اور پیپلز کانفرنس کے جنرل سکریٹری عمران رضا انصاری بھی نظر آتے ہیں۔
قابل ذکر ہے کہ سجاد لون ہندوارہ اسمبلی حلقے سے منتخب ہونے والے سابق رکن اسمبلی ہیں اور وہ پی ڈی پی کے دور اقتدار میں وزیر بھی رہے ہیں۔