یہ الیکشن جموں وکشمیر کی شناخت کے تحفظ کے متعلق ہیں:محبوبہ

سرینگر//
پی ڈی پی کی صدر اور سابق وزیر اعلیٰ محبوبہ مفتی کا کہنا ہے کہ آج کے لوک سبھا انتخابات جموں کشمیر کی شناخت کے تحفظ کو یقینی بنانے کے متعلق ہیں۔انہوں نے کہا کہ یہ الیکشن جموں وکشمیر کے وسائل کو بچانے کے لئے ہیں۔
سابق وزیر اعلیٰ نے ان باتوں کا اظہار ہفتے کے روز جنوبی کشمیر کے ضلع اننت ناگ میں ایک ریلی کے حاشیہ پر نامہ نگاروں کے ساتھ بات کرنے کے دوران کیا۔انہوں نے کہا’’آج بجلی، پانی اور سڑک کا مسئلہ نہیں ہے بلکہ آج کے الیکشن جموں و کشمیر کی شناخت کے متعلق ہیں‘‘۔ان کا کہنا تھا’’آج ہمیں جموں و کشمیر کے وسائل اور شناخت کو بچانا ہے ‘‘۔
محبوبہ نے کہا کہ ہمیں جموںکشمیر کے نوجوانوں کے وقار کو بچانا ہے ۔قبل ازیں انہوں نے ریلی سے خطاب کے دوران کہا کہ جموں وکشمیر میں بے روز گاری بڑھ رہی ہے ۔
پی ڈی پی صدر نے کہا’’ہمیں جیلوں میں بند نوجوانوں کی رہائی اور جموں و کشمیر کے تحفظ کے لئے مل جل کر کام کرنا ہے‘‘۔ان کا کہنا تھا’’یہاں بجلی فیس۲سو روپے ماہانہ تھا جو آج۲ہزار روپے ماہانہ بن گیا ہے ، لوگوں کو راشن برابر نہیں مل رہا ہے ، ایسا نہ ہو کہ ہمیں غلام بنایا جائے ‘‘۔
سابق وزیر اعلیٰ نے لوگوں کو حمایت کرنے کی اپیل کرتے ہوئے کہا’’میری آواز کا تب تک کوئی معنی نہیں ہے جب تک نہ لوگ میری آواز کے ساتھ آواز ملائیں گے‘‘۔انہوں نے کہا’’ہم خاموش نہیں رہ سکتے ہیں جب تک ہم زندہ ہیں ہم تب تک جد وجہد جاری رکھیں گے ۔‘‘