جموں//
ٍ بی جے پی کے جموں وکشمیر یونٹ کے صدر‘ رویندر رینا نے جمعے کے روز کہاکہ ادھم پور پارلیمانی نشست پر بھاجپا ریکارڈ توڑ ووٹوں سے جیت حاصل کرے گی۔
رینا نے کہاکہ اننت ناگ راجوری پارلیمانی سیٹ پر امیدوار اتارنے کا فیصلہ ہائی کمانڈ کے اختیار میں ہے ۔
ان باتوں کا اظہار موصوف نے ادھم پور میں نامہ نگاروں سے بات چیت کے دوران کیا۔
بی جے پی یونٹ صدر نے کہاکہ جمعے کی صبح سے ہی ادھم پور پارلیمانی نشست کے کٹھوعہ ، بلاور ، بسولی ، بانہال ، رام بن ، ڈوڈہ ، بدرواہ اورکشتواڑ میں اچھے خاصے ووٹ پڑے ۔
رینا نے مزید بتایا کہ جس طرح سے لوگوں نے گھروں سے باہر آکر اپنی رائے کا استعمال کیا وہ قابل تعریف ہے ۔ان کے مطابق پولنگ اسٹیشنوں پر صبح سے ہی لمبی لمبی قطاریں دیکھی جارہی ہیں ۔
بی جے پی لیڈرکا مزید کہنا تھا کہ جموں وکشمیر کی سبھی نشستوں پر بھاجپا کی جیت یقینی ہے کیونکہ جس طرح سے لوگوں میں جوش و جذبہ دیکھاجارہا ہے وہ دیدنی ہے ۔
اننت ناگ راجوری پارلیمانی نشست پر امیدوار اتارنے کے بارے میں پوچھے گئے سوال کے جواب میں رویندر رینا نے کہاکہ اس کا فیصلہ تو ہائی کمانڈ کے دائر ہ اختیارمیں ہے ۔انہوں نے کہاکہ بھاجپا کے قومی صدر جے پی نڈا کی جانب سے جو بھی فیصلہ آئے گا وہی حتمی ہوگا۔
رینا نے کہاکہ جہاں تک اننت ناگ پارلیمانی نشست پر بی جے پی کی مضبوطی کا سوال ہے تو میں یہ کہنا چاہتا ہوں کہ بھرتیہ جنتاپارٹی اس سیٹ پر بھی جیت حاصل کرے گی۔
