پہلے مرحلے میں ۸مرکزی وزراء‘۲ سابق وزرائے اعلیٰ اور ایک سابق گورنر میدان میں

نئی دہلی//
۱۹؍اپریل کو ہونے والے انتخابات کے پہلے مرحلے میں۸ مرکزی وزراء‘ دو سابق وزرائے اعلیٰ اور ایک سابق گورنر ان لوگوں میں شامل ہیں جو اپنی انتخابی قسمت کا امتحان لیں گے۔
مرکزی سڑک اور نقل و حمل کے وزیر نتن گڈکری ناگپور سیٹ سے جیت کی ہیٹ ٹرک کی کوشش کر رہے ہیں۔ ۲۰۱۴میں انہوں نے سات بار کے رکن پارلیمنٹ ولاس متیموار کو۸۴ء۲ لاکھ ووٹوں کے فرق سے شکست دی تھی اور ۲۰۱۹میں مہاراشٹر کانگریس کے موجودہ صدر نانا پٹولے کو۱۶ء۲لاکھ ووٹوں سے شکست دے کر اس نشست کو برقرار رکھا تھا۔
مرکزی وزیر کرن رجیجو اروناچل پردیش کی مغربی سیٹ سے انتخاب لڑ رہے ہیں۔ ۵۲ سالہ ۲۰۰۴ سے اب تک تین بار اس حلقے کی نمائندگی کر چکے ہیں۔ رجیجو کے اہم حریف سابق وزیر اعلی اور اروناچل پردیش کانگریس کے موجودہ صدر نبام ٹوکی ہیں۔
مرکزی وزیر برائے بندرگاہ، جہاز رانی اور آبی شاہراہ سربندا سونووال آسام کے ڈبروگڑھ سے لوک سبھا میں واپسی چاہتے ہیں۔ راجیہ سبھا کے رکن سونووال کو ڈبروگڑھ سے اس وقت میدان میں اتارا گیا تھا جب مرکزی وزیر مملکت برائے پٹرولیم و قدرتی گیس رامیشور تیلی کو ٹکٹ نہیں دیا گیا تھا۔
اپنی پیچیدہ ذات پات کی حرکیات کے لئے مشہور مظفر نگر میں سہ رخی انتخابی مقابلہ دیکھنے کو مل رہا ہے، جہاں مرکزی وزیر سنجیو بالیان کا مقابلہ سماج وادی پارٹی کے ہریندر ملک اور بی ایس پی امیدوار دارا سنگھ پرجاپتی سے ہے۔
وزیر اعظم نریندر مودی کی کابینہ میں جونیئر وزیر اور دو بار کے رکن پارلیمنٹ جتیندر سنگھ اودھم پور میں ہیٹ ٹرک کرنے کی کوشش کر رہے ہیں۔
موجودہ ایم پی بالاک ناتھ کی جگہ لینے والے مرکزی وزیر اور راجیہ سبھا کے رکن بھوپندر یادو کا مقابلہ کانگریس کے موجودہ ایم ایل اے للت یادو سے ہے، جن کا تعلق راجستھان کے الور ضلع کے متسیا علاقے سے ہے اور انہیں یادو برادری کی حمایت حاصل ہے۔
مرکزی وزیر قانون‘ ارجن رام میگھوال راجستھان کی بیکانیر پارلیمانی سیٹ سے کانگریس کے سابق وزیر گووند رام میگھوال کے خلاف میدان میں ہیں۔
تمل ناڈو کے نیلگری لوک سبھا حلقہ میں ڈی ایم کے کے موجودہ رکن پارلیمنٹ اور سابق ٹیلی کام وزیر اے راجا اور بی جے پی کے ایل مروگن کے درمیان سخت مقابلہ دیکھنے کو مل رہا ہے۔ مدھیہ پردیش سے راجیہ سبھا کے لئے منتخب ہونے والے موروگن پہلی بار یہاں سے انتخاب لڑ رہے ہیں۔
شیوگنگا کے رکن پارلیمنٹ کارتی چدمبرم اس سیٹ سے دوبارہ انتخاب لڑنے کی کوشش کر رہے ہیں جہاں ان کے والد نے سات بار کامیابی حاصل کی ہے اور ان کا مقابلہ بی جے پی کے ٹی دیوناتھن یادو اور اے آئی اے ڈی ایم کے کے زیویئر داس سے ہے۔
تمل ناڈو کے کوئمبٹور میں بی جے پی صدر کے انناملائی کا مقابلہ ڈی ایم کے لیڈر گنپتی پی راجکمار اور اے آئی اے ڈی ایم کے کے سنگائی رام چندرن سے ہوگا۔
تملیسائی سوندرا راجن، جنہوں نے حال ہی میں تلنگانہ کے گورنر اور پڈوچیری کی لیفٹیننٹ گورنر کے عہدے سے استعفیٰ دے کر سرگرم سیاست میں واپسی کی ہے، چنئی جنوبی لوک سبھا حلقہ سے انتخاب لڑ رہی ہیں۔ کانگریس کی سینئر لیڈر کماری اننت کی بیٹی سوندرا راجن نے۲۰۱۹ کا لوک سبھا الیکشن ڈی ایم کے کی کنی موجھی کے خلاف لڑا تھا، لیکن توتوکوڈی میں بڑے فرق سے ہار گئے تھے۔
اس بار کنی موجھی اس سیٹ سے دوبارہ انتخاب لڑ رہی ہیں۔ این ڈی اے کی حلیف تمل منیلا کانگریس (موپنار) نے ایس ڈی آر وجئے سیلن اور اے آئی اے ڈی ایم کے نے آر شیوسامی ویلومنی کو اس حلقے سے میدان میں اتارا ہے۔
کانگریس لیڈر اور مدھیہ پردیش کے سابق وزیر اعلی کمل ناتھ کے بیٹے نکول ناتھ چھندواڑہ میں دوبارہ انتخاب لڑ رہے ہیں۔
یہ سیٹ کمل ناتھ کے پاس ہے، جو۱۹۸۰ سے اب تک نو بار یہ سیٹ جیت چکے ہیں۔ ۲۰۱۹کے انتخابات میں بی جے پی نے ریاست کی ۲۹ میں سے ۲۸ نشستیں حاصل کی تھیں، لیکن چھندواڑہ کا انتخاب کرنے میں ناکام رہی تھی، جہاں نکول نے بی جے پی کے امیدوار کو ۳۷۵۳۶ ووٹوں سے شکست دے کر ریاست میں کانگریس کے واحد رکن پارلیمنٹ کے طور پر ابھرے تھے۔
تریپورہ کے دو لوک سبھا حلقوں میں سے مغربی تریپورہ کی جس سیٹ پر۱۹؍ اپریل کو پہلے مرحلے میں ووٹ ڈالے جائیں گے، وہاں سابق چیف منسٹر بپلب کمار دیب اور ریاستی کانگریس کے صدر آشیش کمار ساہا کے درمیان سخت مقابلہ ہوگا۔
آسام کے کالیابور حلقہ سے ۲۰۱۴ کے بعد سے دو بار لوک سبھا انتخابات جیتنے کے بعد لوک سبھا میں کانگریس کے ڈپٹی لیڈر اور سابق چیف منسٹر ترون گگوئی کے بیٹے گورو گگوئی پڑوسی ریاست جورہاٹ میں نئے امیدوار کے طور پر سامنے آئے ہیں جہاں ۲۰۱۹میں بی جے پی کے ٹوپون کمار گوگوئی نے کامیابی حاصل کی تھی۔
گورو گگوئی کی جورہاٹ منتقلی ان کے ۲۰۱۹ کے حلقہ کالیابور میں حد بندی کی مشق کے اثر کے بعد ہوئی ہے۔
یاد رہے کہ پہلے مرحلے کے تحت ملک بھر میں ۱۰۲لوک سبھا نشستوں پر جمعہ ۱۹؍اپریل کو ووٹ ڈالے جا رہے ہیں۔