درگاہ میںغیر مقامی شخص کی مبینہ جبری تبدیلی مذہب

سرینگر//
جموں کشمیر پولیس نے جمعتہ الوداع کے موقع پر پیش آنے والے ایک واقعہ کی ایف آئی آر درج کی ہے، جس میں ایک غیر مقامی شخص نے مبینہ طور پر اسلام قبول کیا تھا، جسے پولیس نے ’جبری تبدیلی مذہب‘قرار دیا ہے۔
مذہب تبدیل کرنے کے واقعہ کی ویڈیو سوشل میڈیا پلیٹ فارم، خاص طور پر فیس بک پر وائرل ہوگئی۔
ایک مقامی خبر رساں ایجنسی‘کشمیر ڈاٹ کام کو موصول ایف آئی آر کی کاپی میں کہا گیا ہے’’باوثوق ذرائع کے مطابق نیوز پورٹل سے جڑے کچھ لوگوں کی جانب سے شیئر کیے گئے ویڈیو میں ہریانہ میں رہنے والے سندیپ نامی شخص کو حضرت بل مندر میں جمعہ کی نماز کے دوران مبینہ طور پر اپنا مذہب تبدیل کرتے ہوئے دکھایا گیا ہے‘‘۔
پولیس ایفآئی آر میں کہا گیا ہے ’’اس ویڈیو کی تشہیرنے عوام میں بے چینی پیدا کردی ہے اور مذہبی ہم آہنگی اور رواداری کے بارے میں تشویش پیدا کردی ہے۔ اس واقعہ پر جموں و کشمیر اور مرکز کے زیر انتظام علاقوں کی سرحدوں کے باہر بھی سخت رد عمل سامنے آیا ہے، جس سے فرقہ واریت اور فرقہ وارانہ اختلافات کو بڑھاوا مل سکتا ہے‘‘۔
پولیس کے مطابق’’مزید تفتیش سے پتہ چلا ہے کہ گھریلو ملازم سندیپ کو گھر کے مالک عنایت منتظر‘ ساکنہ نوہٹہ نے مبینہ طور پر اس کی ذہن سازی کی۔ عنایت مبینہ طور پر سندیپ کو حضرت بل درگاہ لے گیا، جہاں اس نے مبینہ طور پر اسے اپنا مذہب تبدیل کرنے کے لئے باجماعت نماز کے دوران کلمہ پڑھنے کے لئے مجبور کیا‘‘۔
دریں اثناء ایک عہدیدار نے خبر رساں ایجنسی کو بتایا کہ آئی پی سی کی مختلف دفعات کے تحت نگین پولیس اسٹیشن میں ایف آئی آر نمبر۵۵/۲۰۲۴ درج کی گئی ہے، جن میں ۱۸۸ (سرکاری ملازم کے حکم کی نافرمانی)‘۲۹۸ (مذہبی جذبات کو ٹھیس پہنچانے کے ارادے سے جان بوجھ کر الفاظ وغیرہ بولنا)‘۱۵۳ (فساد پھیلانے کے ارادے سے اشتعال انگیزی کرنا) اور۱۵۳؍اے (مذہب، نسل، جائے پیدائش، رہائش، زبان وغیرہ کی بنیاد پر مختلف گروہوں کے درمیان دشمنی کو فروغ دینا، اور ہم آہنگی کو برقرار رکھنے کے لئے نقصان دہ کام کرنا)شامل ہے۔
مزید برآں، سب انسپکٹر رینک کے ایک افسر کو کیس کی فائل مکمل کرنے اور مزید کارروائی کے لئے پولیس سپرنٹنڈنٹ کو تحقیقاتی رپورٹ پیش کرنے کا کام سونپا گیا ہے۔
جموں و کشمیر پولیس نے عوام سے پرسکون رہنے کی اپیل کی ہے کیونکہ وہ اس معاملے کو تندہی سے حل کرنے اور انصاف کی فراہمی کو یقینی بنانے کے لئے کام کر رہے ہیں۔