بجبہاڑہ شاہراہ پر جنگی جہازوں کی کامیاب آزمائشی لینڈنگ

سرینگر//
بھارتی فضائیہ (آئی اے ایف) نے پیر اور منگل کی درمیانی شب جنوبی کشمیر کے ضلع اننت ناگ کے بجبہاڑہ علاقے میں سرینگر، جموں قومی شاہراہ پر۵ء۳کلو میٹر طویل ہنگامی لینڈنگ پٹی پر چنکوٹ ہیلی کاپٹروں کی آزمائشی رن کا کامیاب انعقاد کیا۔
متعلقہ ذرائع نے بتایا کہ آئی اے ایف نے دوران شب پٹی پر کم سے کم۹ٹرائل کئے اور ٹرائل کرنے کا یہ سلسلہ رات کے پونے چار بجے سے ساڑھے چار بجے تک جاری رہا۔
ذرائع نے کہا کہ ٹرائل کے دوران قومی شاہراہ پر ٹریفک کو متبادل راستوں کی طرف موڑ دیا گیا تھا اور پٹی کے گرد و پیش علاقوں کو مکمل طور پر سینیٹائز کیا گیا تھا۔انہوں نے کہا کہ اس علاقے میں سیکورٹی کے تھری ٹائر انتظامات کئے گئے تھے ۔
متعلقہ حکام نے بتایا کہ آئی اے ایف کے ذریعہ کئے گئے ٹرائلز کا مقصد لینڈنگ کی فزیبلٹی کا پتہ لگانا تھا جس کیلئے چنوک ہیلی کاپٹروں کا استعمال کیا گیا۔
بتادیں کہ اس ہوائی پٹی کی تعمیر سال۲۰۲۰میں ۱۱۹کروڑ رویے کی لاگت سے شروع کی گئی تھی۔حکام کا کہنا ہے کہ اس پٹی کو اسٹریٹجک مقاصد کے ساتھ ساتھ قدرتی آفات کے دوران بچائو اور امدادی کارروائیوں کے لئے استعمال کیا جا سکتا ہے ۔
اننت ناگ کے بجبہاڑہ علاقے میں سرینگر، جموں قومی شاہراہ پر آزمائشی رن کے پیش نظر حکام نے سیکورٹی کے سخت انتظامات کئے تھے ۔
ذرائع نے بتایا کہ علاقے میں سیکورٹی فورسز کی بھاری نفری کی تعیناتی کے علاوہ سی سی ٹی وی کیمروں سمیت مختلف تکنیکی آلات نصب کئے گئے تھے ۔