چلئے صاحب جو ہونا تھا وہ ہوا …اور ہوا یہ کہ…کہ ہوا کچھ بھی نہیں ۔ ہونے کو تو بہت کچھ ہوا … لوک سبھا الیکشن کا شیڈول سامنے لایا گیا… کچھ ریاستوں میں اسمبلی انتخابات کی تاریخیں بھی دی گئیں… لیکن… لیکن صاحب ہم وہیں کے وہیں رہے … ہمارے بارے میں کوئی بات نہیں ہو ئی … یوں تو جموں کشمیر میں بھی الیکشن ہو ں گے… پانچ مرحلوں میں ہوں گے‘ لیکن… لیکن وہ الیکشن نہیں ہوں گے جن کا سب کو انتظار ہے… اسمبلی الیکشن نہیں ہوں گے… گرچہ انتخابی کمیشن نے کہا …یہ کہا کہ جموں کشمیر میں بھی اسمبلی الیکشن’ Due‘ہیں… لیکن… لیکن یہ بات ہم کئی برسوں سے سنتے آئی ہیں…البتہ وہ بات ہم نہیں سن رہے ہیں جو ہم سننا چاہتے ہیں… یہ سننا کہ … کہ جموں کشمیر میں اسمبلی الیکشن فلاں تاریخ سے ہوں گے… یہ بات ہمیں سننے کو نہیں مل رہی ہے… ہمیں امید تھی… امید کیا ‘سچ پو چھئے تو…تو یقین بھی تھا کہ… کہ آج ہماری بھی بات ہو گی…آج ہماری بھی بات بن جائیگی اور… اور اس لئے بن جائیگی کہ… کہ موقع بھی ہے اور دوستور بھی… لیکن صاحب … جب بات ہماری ہوتی… جموں کشمیر کی ہوتی ہے تو…تو…’لیکن،ویکن‘اگر‘ مگر‘ کا عمل دخل ہو تا ہے… بہت زیادہ عمل دخل ہو تا ہے… اور اب کی بار بھی ایسا ہی ہوا… گرچہ الیکشن کمیشن نے کوئی اگر اور مگر ‘لیکن ویکن کی بات نہیں کی اور… اور اس لئے نہیں کی کہ اس نے جموں کشمیر میں اسمبلی الیکشن میں کسی بھی تاخیر سے انکار کیا… سرے سے ہی انکار کیا ۔رہی یہ بات کہ جموں کشمیر میں اگر الیکشن ’Due‘ ہیں تو… تووہ کیا چیز ہے جو کمیشن کو جموں کشمیر میں اسمبلی الیکشن کے انعقاد سے روک رہی ہے… کہ اگر جموں کشمیر میں لوک سبھا الیکشن ہو سکتے ہیں تو… تو اسمبلی الیکشن کیوں نہیں ہو سکتے ہیں … تو… تو صاحب کمیشن نے سارا ملبہ جموں کشمیر کی انتظامیہ پر ڈال دیا … یہ کہتے ہوئے ڈال دیا کہ … کہ کم و بیش ایک ہزار امیدواروں کو سکیورٹی فراہم کرنی پڑے گی جو اس وقت ممکن نہیں ہے۔لیکن… لیکن جونہی لوک سبھا الیکشن ہوں گے تو… تو جموں کشمیر میں اسمبلی الیکشن کرائے جائیں گے۔لیکن صاحب یہ کشمیر … کشمیر ہے۔یہاں بہت کچھ کہا جاتا ہے اور… اور جتنا کہا جاتا ہے اس سے کئی گنا زیادہ چھپایا بھی جاتا ہے… جیسے یہ کہ اصل میں جموں کشمیر میں لوک سبھا کے ساتھ ہی اسمبلی الیکشن کیوں نہیں کرائے جا رہے ہیں کہ… کہ اللہ میاں کی قسم ہاتھی کے دانت کھانے کے اور دکھانے کے اور ہو تے ہیں۔ ہے نا؟
