نئی دہلی // دہلی کے وزیر اعلی اروند کیجریوال نے لیفٹیننٹ گورنر وی کے سکسینہ پر اپوزیشن کا کردار ادا کرنے کا الزام لگاتے ہوئے منگل کو کہا کہ وہ سات دنوں کے اندر تمام علاقوں کی خامیوں کو دور کرنے کے لئے چیف سکریٹری کو حکم دیتے ہیں۔
مسٹر کیجریوال نے آج ‘ایکس’ پر لکھا، "میں آپ کا شکر گزار ہوں کہ آپ نے ہماری خامیاں بتائیں ۔ اس سے قبل آپ نے کراڑی اور براڑی کی خامیوں کو بھی اجاگرکیا تھا۔ میں ابھی چیف سیکرٹری کو حکم دے رہا ہوں کہ وہ سات دن کے اندر ان تمام علاقوں کی ان سبھی خامیوں کو دور کرے ۔
انہوں نے کہا کہ جو کام آپ کر رہے ہیں وہ اپوزیشن کو کرنا چاہیے تھا۔ حکمران جماعت کی خامیاں نکالنا اپوزیشن کا کام ہے ۔ بدقسمتی سے آج اپوزیشن یعنی بی جے پی کے ساتوں ممبران پارلیمنٹ سیاست سے ریٹائر ہونے میں مصروف ہیں اور آٹھ ایم ایل ایز گہری نیند سو رہے ہیں۔ یہی وجہ ہے کہ دہلی میں اقتدار گزشتہ 26 سال سے بی جے پی سے دور ہے ۔ اس لیے مجبوری میں آپ کو لیفٹیننٹ گورنر کا آئینی عہدہ رکھنے کے باوجود اپوزیشن کا کردار ادا کرنا پڑ رہا ہے ۔
وزیر اعلیٰ نے کہا کہ آپ نے جن خامیوں کی نشاندہی کی ہے ، جن افسران کو یہ کام کرنا تھا اور انہوں نے نہیں کیا ، ان کے خلاف سخت ترین کارروائی ہونی چاہیے ۔ "خدمت” اور "چوکسی” آپ کے دائرہ اختیار میں ہے ۔ اگر یہ میرے اختیار میں ہوتا تو میں ایسی لاپرواہی برتنے والے افسران کو نہ صرف فوری طور پر معطل کر دیتا بلکہ ان کے خلاف ایسی کارروائی کرتا کہ کسی دوسرے افسر کو ایسی کوتاہی کرنے کی جرأت نہ ہوتی۔ مجھے امید ہے کہ آپ ان محکموں کے اعلیٰ ترین افسران کو فوری طور پر معطل اور سزا دیں گے ۔ دو کروڑ دہلی والے آپ کی کارروائی کا انتظار کریں گے ۔