’اپوزیشن کو اپنی ہار کا یقین ہے‘۔۔۔ان کے پاس ملک کی ترقی کیلیء کوئی نقش راہ نہیں ہے :وزیر اعظم مودی

تیرو اننت پورم//
وزیر اعظم نریندر مودی نے آج دعویٰ کیا کہ اپوزیشن کو یقین ہے کہ وہ آئندہ لوک سبھا انتخابات نہیں جیت پائے گی اور وہ انہیں گالیاں دے رہی ہے کیونکہ اس کے پاس مبینہ طور پر ملک کی ترقی کیلئے کوئی روڈ میپ نہیں ہے۔
مودی نے یہاں سینٹرل اسٹیڈیم میں بی جے پی کی ریاستی اکائی کی پدیاترا کی اختتامی تقریب سے خطاب کرتے ہوئے کیرالہ کے عوام پر زور دیا کہ وہ بھگوا پارٹی کو۲۰۲۴کے لوک سبھا انتخابات میں دو ہندسوں میں نشستیں دیں۔
وزیر اعظم نے مزید کہا کہ بی جے پی کبھی بھی ریاست کو ووٹ بینک کے نقطہ نظر سے نہیں دیکھتی ہے۔
مودی نے دعویٰ کیا کہ گزشتہ ۱۰سالوں میں کیرالہ نے دیگر بی جے پی زیر اقتدار ریاستوں کی طرح ترقی سے فائدہ اٹھایا ہے۔انہوں نے کہا کہ کیرالہ کے عوام کے خوابوں اور توقعات کو پورا کرنے کیلئے ہر ممکن کوشش کرنا ان کی ضمانت ہے۔
وزیر اعظم نے کہا کہ ہندوستان کو دنیا کی تیسری سب سے بڑی معیشت بنانے کے ساتھ ساتھ ملک سے غربت اور بدعنوانی کا خاتمہ کرنے کیلئے یہ ’مودی یودے گارنٹی‘ (مودی کی گارنٹی) ہے۔
ان کاکہنا تھا’’مودی حکومت کی تیسری مدت میں ہندوستان دنیا کی تیسری سب سے بڑی طاقت بن جائے گا۔ یہی مودی کی ضمانت ہے۔ تیسری مودی حکومت بدعنوانی کے خلاف لڑائی کو تیز کرے گی۔ گزشتہ ۱۰سالوں میں ۲۵کروڑ سے زیادہ لوگوں کو غربت سے نکالا جا سکا ہے‘‘۔
اپنی حکومت کے دوران شروع کئے گئے مختلف ترقیاتی پروجیکٹوں اور فلاحی اسکیموں کا ذکر کرتے ہوئے وزیر اعظم مودی نے کہا کہ کیرالہ حکومت کے عدم تعاون کے باوجود مرکز نے ریاست کو اولین ترجیح دی ہے۔ انہوں نے کہا کہ حکومت نے امتحانی نظام میں تبدیلی کی ہے تاکہ ملازمت کے متلاشی افراد ملیالم سمیت علاقائی زبانوں میں امتحان دے سکیں۔
وزیر اعظم مودی نے کانگریس اور سی پی آئی (ایم) پر حملہ کرتے ہوئے کہا کہ کانگریس اور سی پی آئی (ایم) کا ٹریک ریکارڈ کیا ہے؟ کئی دہائیوں تک کانگریس نے ایک خاندان کی خاطر ملک کے مفاد کو داؤ پر لگا دیا تھا۔ کیرالہ میں سی پی آئی (ایم) بھی کانگریس کے خاندانی حکمرانی کے راستے پر چل رہی ہے۔ ان کاکہنا تھا’’کیرالہ میں ایک دوسرے سے لڑنے والی کانگریس اور سی پی آئی (ایم) دہلی میں متحد ہیں۔ مجھے کوئی شک نہیں ہے کہ آنے والے انتخابات میں عوام اس دوہرے معیار کا منہ توڑ جواب دیں گے۔یہ انتخابات ایک نئے کیرالہ کی تشکیل کے لئے ایک موقع ثابت ہوں گے۔ بی جے پی کا نعرہ ’سب کا وکاس، سب کا ساتھ اور سب کا وشواس‘ ہے‘‘۔ انہوں نے کہا کہ بی جے پی کی تیسری حکومت بھی ان موضوعات پر کام کرے گی۔
مودی نے کہا کہ سریندرن کی قیادت والی پدیاترا میں شامل ہونے والے بڑی تعداد نے لوک سبھا میں بی جے پی کے ۳۷۰نشستوں کے ہدف کو آسان بنا دیا ہے۔ انہوں نے کہا کہ مودی آپ کی توقعات پر پورا اترنے کیلئے پرعزم ہیں، یہی مودی کی ضمانت ہے۔ (ایجنسیاں)