بارہ مولہ میں ملی ٹینٹ معاون گرینیڈ سمیت گرفتار :پولیس

سرینگر//
شمالی ضلع بارہمولہ کے پٹن علاقے میں سیکورٹی فورسز نے ایک مشترکہ آپریشن کے دوران لشکر طیبہ سے وابستہ ملی ٹینٹ معاون کی گرفتاری عمل میں لا کر اس کے قبضے سے گرینیڈ برآمد کرنے کا دعویٰ کیا ہے۔
پولیس کے ایک ترجمان نے بتایا کہ بارہمولہ کے پٹن علاقے میں ملی ٹینٹوں کی نقل وحرکت کی اطلاع ملنے کے بعد بارہ مولہ پولیس‘۲بٹالین ایس ایس اور ۲۹آر آر نے چنار کراسنگ پٹن کے نزدیک ناکہ لگایاجس دوران ایک نوجوان نے سیکورٹی فورسز کو دیکھتے ہی راہ فرار اختیار کرنے کی کوشش کی تاہم سلامتی عملے نے پیشہ وارانہ صلاحیتوں کو بروئے کار لا کر نوجوان کو دھر دبوچا۔
ترجمان نے بتایا کہ نوجوان کی شناخت معراج الدین بٹ ولد منظور احمد بٹ ساکن منڈیاری پٹن کے بطور ہوئی ہے۔ترجمان کے مطابق جامہ تلاشی کے دوران ملی ٹینٹ معاون کے قبضے سے ایک ہینڈ گرینیڈ برآمد کرکے ضبط کیا گیا۔
دریں اثنا پولیس نے معاملے کی نسبت کیس درج کرکے مزید تحقیقات شروع کی ہے۔