سرینگر جموں شاہراہ جزوی طورپر یکطرفہ ٹریفک کیلئے بحال

سرینگر//
جموں سرینگر قومی شاہراہ کو آج چار روز مسلسل بند رہنے کے بعد ٹریفک کی آمدو رفت کیلئے جزوی طور سے بحال کر دیا ہے۔ اس دوران شاہراہ پر درماندہ مسافروں گاڑیوں کو چلنے کی اجازت دے دی گئی ہے۔
واضح رہے کہ حالیہ برفباری و بارشوں کے دوران ضلع رامبن کے مختلف مقامات جیسے ڈھلواس کیفٹریا موڑ ماروگ پنٹھیال گانگروں و شیر بی بی علاقے میں بھاری مٹی کے تودے اور چٹانیں کھسکنے کی وجہ سے شاہراہ پر ٹریفک کی آمدورفت بند ہوئی تھی۔
شاہراہ بند ہونے کے بعد انتظامیہ نے عملہ اور میشنری کو کام پر لگایا تھا۔موسم میں آئی بہتری اور عملہ کی جانب سے مسلسل کوششوں کے بعد آج شاہراہ کو ٹریفک کے لیے جزوی دور پر بحال کر دیا ہے۔
اس سلسلے میں ٹریفک پولیس نے ’ایکس‘ پر ایک پوسٹ میں کہا ’’سرینگر جموں شاہراہ کو جزوی طور پر یکطرفہ ٹریفک کیلئے کھول دیا گیا ہے ۔بانہال اور ناشری کے درمیان درماندہ گاڑیوں کو ہی آگے جانے کی اجازت دی جا رہی ہے ۔مسافروں سے کہا جارہا ہے کہ وہ نظم و نسق کا مظاہرہ کریں۔احتیاط سے گاڑی چلائیں کیونکہ رام بن اور بانہال کے درمیان پتھروں کے کھسکنے کا خدشہ ہے‘‘۔
ادھر جنوبی کشمیر کے ضلع شوپیاں کو صوبہ جموں کے راجوری اور پونچھ اضلاع کے ساتھ جوڑنے والے تاریخی مغل روڈ پر گزشتہ کئی روز سے ٹریفک بند ہے، جبکہ سرینگر، لیہہ شاہراہ پر بھی برف جمع ہونے کی وجہ سے ٹریفک کی نقل و حمل بند ہے۔اس کے علاوہ بھدرواہ،کشتواڑ،سنتھن،اننت ناگ روڈ بھی ٹریفک کی نقل و حمل کیلئے بند ہے۔