آسٹریلیا نے ویسٹ انڈیزکوپہلے ٹی ٹونٹی کرکٹ میچ میں 11رنز سے ہرا دیا

ہوبارٹ //
آسٹریلیا نےویسٹ انڈیز کو پہلے ٹی ٹونٹی کرکٹ میچ میں دلچسپ مقابلے کے بعد 11 رنز سے شکست دے کر تین میچوں کی سیریز میں 0-1 کی برتری حاصل کرلی۔ ویسٹ انڈیز کی ٹیم 214 رنز کے ہدف کے تعاقب میں مقررہ 20اوورز میں 8 وکٹوں کے نقصان پر 202 رنز بنا سکی ۔ڈیوڈ وارنر نے 70 رنز کی عمدہ اننگز کھیل کر اپنی ٹیم کی فتح میں کلیدی کردار ادا کیا، اس عمدہ کارکردگی پر ان کو میچ کا بہترین کھلاڑی قرار دیا گیا۔
جمعہ کو بیلریو اوول، ہوبارٹ میں کھیلے گئے تین میچوں کی سیریز کے پہلے ٹی ٹونٹی میچ میں مہمان ٹیم ویسٹ انڈیز کے کپتان رومین پائول نے ٹاس جیت کر پہلے فیلڈنگ کا فیصلہ کیا۔میزبان آسٹریلوی ٹیم نے پہلے کھیلتے ہوئے مقررہ 20 اوورز میں 7 وکٹوں کے نقصان پر 213 رنز بنا کر ویسٹ انڈیز کی ٹیم کو میچ میں کامیابی کے لئے 214 رنز کا ہدف دیا۔
اوپننگ بلے باز ڈیوڈ وارنر 70رنز کی عمدہ اننگز کھیلی ، جوش انگلس 39،ٹم ڈیوڈ ناقابل شکست 37 اور میتھیو ویڈ21 رنز کے ساتھ دوسرے نمایاں بیٹر رہے ۔
آندرے رسل نے تین، الزاری جوزف نے دو جبکہ جیسن ہولڈر اورروماریو شیفرڈنے ایک، ایک کھلاڑی کو آؤٹ کیا ۔ ویسٹ انڈیز کی ٹیم مطلوبہ ہدف حاصل کرنے میں ناکام رہی اور ،مقررہ اوورز میں 8وکٹوں کے نقصان پر 202 رنز بناسکی۔ برینڈن کنگ نے 53 رنز کی اننگز کھیلی ،جانسن چارلس 42رنز بناکر آئوٹ ہوئے۔آل رائونڈر جیسن ہولڈر نے ناقابل شکست 34رنز بنائے، نکولس پوران 18،شائی ہوپ 16 اور کپتان رومین پائول 14 رنز بناکر آئوٹ ہوئے۔
کینگروز بائولرز کی عمدہ بائولنگ کے باعث مہمان ویسٹ انڈین ٹیم کے چار کھلاڑی دوہراہندسہ بھی عبور نہ کر پائے۔یوں آسٹریلیا نے ویسٹ انڈیز ٹیم کو پہلے ٹی ٹونٹی میچ میں 11 رنز سے شکست دے کر تین میچوں کی سیریز میں 0-1 کی برتری حاصل کرلی۔آسٹریلیا کی طرف سے ایڈم زمپا نے تین،مارکس سٹوئنس نے دو جبکہ جیسن بیرنڈورف،گلین میکسویل اور شان ایبٹ نے ایک ایک کھلاڑی کو آئوٹ کیا۔ کینگروز مایہ ناز اوپننگ بلے باز ڈیوڈ وارنر کو عمدہ بیٹنگ پر میچ کا بہترین کھلاڑی قرار دیا گیا۔