رضوان نے بابراعظم کیساتھ اوپننگ جوڑی ٹوٹنے پر اپنے خیالات کا اظہار کردیا

لاہور//
پاکستانی ٹیم کے وکٹ کیپر بیٹر محمد رضوان نے بابراعظم کے ساتھ ٹی20 فارمیٹ میں اپنی شراکت توڑنے پر بات کی۔ ویب سائٹ ’کرک بز‘ کو دیئے گئے انٹرویو میں محمد رضوان سے سوال کیا گیا کہ ٹی ٹونٹی کرکٹ میں نیوزی لینڈ کیخلاف سیریز میں بابراعظم اور آپ کی اوپننگ جوڑی توڑنے سے کیا کوئی فائدہ ہوا؟۔ وکٹ کیپر نے جواب دیتے ہوئے کہا کہ یہ حقیقت نہیں ہے، ٹیم مینجمنٹ نے محض ورلڈکپ کو مدنظر رکھتے ہوئے کچھ چیزیں تبدیل کیں تاکہ میگا ایونٹ سے قبل اچھا کمبی نیشن بنا سکیں۔
انہوں نے کہا کہ ورلڈ کپ کیلئے بہترین پلئینگ الیون بنانے کے خواہاں ہیں، اوپننگ میں دائیں اور بائیں بلے بازوں کے ساتھ امتزاج بنانے کی کوشش کررہے ہیں، مجھے نہیں لگتا کہ یہ کوئی غلط فیصلہ ہے۔ رضوان نے کہا کہ میں مینجمنٹ فیصلے سے ناراض نہیں ہوں بلکہ ٹی ٹونٹی ورلڈ کپ 2024ء ویسٹ انڈیز اور امریکا میں شیڈول ہے جہاں بال سپن ہوگا تو ہمیں مختلف قسم کے بیٹرز کی ضرورت ہوگی۔