انڈیا بلاک کا حال بے حال کیوں ہے اس کو سمجھنا کوئی مشکل کام‘ کوئی راکٹ سائنس نہیں ہے اور… او ر بالکل بھی نہیں ہے ۔ اپنے گورے گورے بانکے چھورے عمر عبداللہ ‘ جن کی جماعت نیشنل کانفرنس ’انڈیا‘بلاک کا حصہ ہے ‘ کے حالیہ بیانات سمجھنے سے ہی یہ بات سمجھ میں آجاتی ہے کہ… کہ آخر’ انڈیا‘ بلاک آگے کیوں نہیں بڑھ رہا ہے… الیکشن … لوک سبھا الیکشن سر پر ہیں اور ابھی کسی بھی ریاست میں سیٹوں کی تقسیم پر اتفاق نہیں ہو پارہا ہے ۔ اپنے عمرعبداللہ نے روز گزشتہ جموں میں کہا کہ… کہ جموں کشمیر میں صرف ان نشستوں کی تقسیم پر بات ہو گی جو بی جے پی کے قبضے میں ہیں… ان تین نشستوں پر نہیں جو نیشنل کانفرنس کے پاس ہیں… گورے گورے بانکے چھورے یہ کہنا چاہتے ہیں کہ …کہ نیشنل کانفرنس اپنی تین نشستوں میں سے کوئی ایک بھی نشست’ انڈیا‘ بلاک کی کسی اور جماعت کیلئے نہیں چھوڑے گی اور… اور اس لئے نہیں چھوڑے گی کیونکہ نیشنل کانفرنس اس بلاک کا حصہ ہے اور… اور یوں یہ تینوں نشستیں انڈیا بلاک کی ہی ہیں… کسی اور کی نہیں ۔ سننے میں تو عمرعبداللہ کی بات بڑی معقول نظر آتی ہے… اس میں منطق بھی ہے… لیکن … لیکن ایک بات جو ہم نہیں سمجھ رہے ہیں کہ… کہ اگر عمر عبداللہ کی اس بات کو تسلیم کیا جائے تو… تو پی ڈی پی کہاں جائیگی کہ پی ڈی پی بھی تو’ انڈیا‘ بلاک میں شامل ہے ۔ ہاں مانتے ہیں کہ پچھلے لوک سبھا الیکشن میں پی ڈی پی کے حصے میں کوئی بھی لوک سبھا سیٹ نہیں آئی تو… تو کیا اس کا یہ مطلب ہے کہ ہونے والے لوک سبھا الیکشن میں اسے اپنے امیدوار کھڑا کرنے کا حق نہیں ہے اور… اور اس لئے نہیں ہے کیوں کہ پچھلے الیکشن میں اسے شکست ہو ئی تھی… اور این سی کو حق اس لئے ہے کیوں کہ یہ جیت گئی تھی… یہ کیا بات ہوئی ؟یقینا پی ڈی پی کو یہ قبول نہیں ہو گا اور … اور ہونا بھی نہیں چاہئے۔وہ یقینا لوک سبھا الیکشن سے دستبردار نہیں ہو گی اوراپنے امیدواروں کو میدان میں اتارے گی… ایسا ہونے پر کشمیر میں مقابلہ این سی اور پی ڈی پی میں ہو گا اور… اور یہ دونوں جماعتیں ’انڈیا‘ بلاک کا حصہ ہیں… اُس ’انڈیا‘ بلاک کا جسے ہر جگہ‘ہر ریاست میں ایسی کی صورتحال کا سامنا ہے اور… اور اسی لئے یہ اپنی موت آپ مررہا ہے اور… اور سو فیصد مررہا ہے ۔ ہے نا؟
انڈیا بلاک:اپنی موت آپ…؟
