اسی کو کہتے ہیں دھو ڈالا … اتنا تو دھوبی بھی کپڑوں کو نہیں دھو ڈالتا ہے جتنا جناب وزیر اعظم‘نریندر مودی جی نے اپنے چہیتے راہل گاندھی اور اپوزیشن جماعت کانگریس کو روز گزشتہ لوک سبھا میں دھو ڈالا ۔یقین کیجئے کہ ہم حیران ہیں اور… اوراس لئے ہیں کیونکہ ہماری سمجھ میں یہ نہیں آرہا ہے اور… اور بالکل بھی نہیں آرہا ہے کہ جناب وزیر اعظم نے کانگریس اور راہل گاندھی کو جتنا دھو ڈالا کیا اس کی ضرورت تھی بھی؟مانا کہ آئندہ کچھ ایک ماہ میں الیکشن… لوک سبھا الیکشن ہونے والے ہیں اور… اور جناب وزیر اعظم کا لوک سبھا میں لب و لہجہ انتخابی مہم کے دوران کی جانے والی تقریر سے کچھ بھی مختلف نہیں تھا… لیکن… لیکن صاحب ہم پھر بھی کہیں گے کہ انہوں نے جو کیا … کیا وہ کرنے کی ضرورت تھی بھی… وہ کیا ہے کہ جناب وزیر اعظم خود ہی کہتے ہیں کہ ان کی تیسری باری… یعنی مسلسل تیسری بار شہنشاہ ہند بننا زیادہ دور نہیں… لگاتار تیسری بار ان کی تاج پوشی میں سو … سوا سو دن رہ گئے ہیں… جب انہیں اس بات کا اتنا یقین ہے… اپنی جیت … مسلسل تیسری جیت اور فتح کا جب انہیں اتنا یقین ہے تو… تو صاحب پھر راہل گاندھی کی ایسی بری حالت کرنے کی کیا ضرورت تھی؟جناب وزیر اعظم نے بالکل ایک ساس کی طرح کانگریس کو یہ طعنہ دیا کہ جب وہ بار بار ایک ہی پروڈکٹ (راہل گاندھی) کو بازار میں لائیگی تو… تو یقینا اس کی دکان بند ہو گی… اس کی دکان کا بند ہو نا یقینی ہے ۔ ہم سوچ رہے ہیں کہ جب راہل گاندھی نے اپنے بارے میں اس طرح کی جلی کٹی باتیں سنی ہوں گی… وہ بھی کسی ایرے گیرے نتھوں خیرے سے نہیں بلکہ جناب وزیر اعظم کے منہ سے سنی ہوں گی تو… تو ان کے اس نازک سے دل پر کیا گزی ہو گی… ایک تو راہل گاندھی جانتے ہیں کہ الیکشن کے نتائج کے بارے میں جناب وزیرا عظم جو کچھ بھی کہہ رہے ہیں سچ کہہ رہے ہیں … صحیح کہہ رہے ہیں… راہل گاندھی پہلے سے ہی ہار … لوک سبھا الیکشن میں ہار کے صدمے سے دو چار ہیں… اور… اور اوپر سے جناب وزیرا عظم کے ان پر ایسے حملے… یقینا ان کا جینا مشکل کر دیں گے کہ … کہ آخر راہل گاندھی بھی تو ایک انسان ہی ہیں… کتنا برداشت کر سکتے ہیں … ہم تو جناب وزیر اعظم سے صرف اتنا کہنا چاہتے ہیں کہ جناب مارے ہو ئے کو کیا مارنا کہ… کہ یقینا اگلے الیکشن میں بھی آپ کی ہی جیت ہو گی … اور اس جیت کی خوشی میں کانگریس اور راہل گاندھی پر زیادہ نہیں تو… تو تھوڑا رحم کیجئے ۔ ہے نا؟