’مٹو پولیس اہلکاروں پر حملہ کرنے کی سازش کا حصہ ہے‘

نئی دہلی//
دہلی پولیس کو شبہ ہے کہ جمعرات کو گرفتار کیا گیا حزب المجاہدین کا دہشت گرد جموں و کشمیر میں مزید پولیس اہلکاروں پر حملہ کرنے کی ایک بڑی سازش کا حصہ ہے۔
دہلی پولیس کی اسپیشل سیل نے جمعرات کو’اے پلس پلس ‘کیٹیگری کے دہشت گرد جاوید احمد مٹو کو گرفتار کیا، جو جموں و کشمیر میں پانچ دستی بم حملوں اور کم از کم پانچ پولیس اہلکاروں کے قتل سمیت دہشت گردانہ حملوں کے۱۱ معاملوں میں مطلوب تھا۔ اس پر دس لاکھ روپے کا انعام تھا۔
پولیس ذرائع نے بتایا کہ شبہ ہے کہ مٹو پاکستان سے نیپال کے راستے وادی جانے کیلئے قومی راجدھانی کو ٹرانزٹ پوائنٹ کے طور پر استعمال کر رہا تھا۔ لیکن عہدیدار اب بھی دہلی پہنچنے سے پہلے اس کی آخری منزل کے بارے میں پوچھ تاچھ کر رہے ہیں۔
ذرائع نے کہا کہ مٹو کو راکٹ سے چلنے والے گرینیڈ (آر پی جی)، انڈر بیرل گرینیڈ لانچر (یو بی جی ایل) اور اے کے ۴۷ چلانے میں مہارت حاصل ہے۔ ان کا ہدف بہت درست ہے۔ذرائع نے مزید کہا کہ مٹو نے یہ سب کچھ ٹریننگ میں یہ سیکھا ہو گا۔
دہلی پولیس کے اسپیشل سیل نے جمعرات کو اسے نظام الدین سے ایک بھری ہوئی پستول اور ایک اضافی میگزین کے ساتھ گرفتار کیا۔ پولیس نے بتایا کہ جب اسے گرفتار کیا گیا تو وہ چوری شدہ گاڑی چلا رہا تھا۔
دہلی پولیس نے ان کے خلاف آرمز ایکٹ اور سازش کے تحت معاملہ درج کیا ہے۔ سازش اور اس کے مزید منصوبوں کے بارے میں مزید تفصیلات حاصل کرنے کے لئے اس سے پوچھ گچھ بھی کی جارہی ہے۔ ذرائع نے بتایا کہ عہدیدار ان کے دہلی آنے کی اصل وجہ جاننے کیلئے ان سے پوچھ تاچھ بھی کر رہے ہیں۔
سوپور کا رہنے والا مٹو گزشتہ ۱۰سال سے جموں و کشمیر سے باہر تھا۔یہ شبہ ہے کہ وہ پاکستان میں کہیں رہ رہا تھا لیکن نیپال کے راستے ہندوستان میں داخل ہوا تھا۔ وہ پاکستان جانے کا موقع تلاش کر رہا تھا۔
ایک پولیس افسر نے بتایا کہ مٹو، عبدالقیوم نذر کی سربراہی میں گروپ کا ایک اہم رکن تھا، جو جموں و کشمیر میں دہشت گرد ماڈیول کا آپریشنل انچارج تھا۔