پونچھ شہری ہلاکتیں:غیرجانبدارانہ تحقیقات ہونی چاہئے:فاروق

سرینگر//
جموںکشمیر نیشنل کانفرنس کے صدر ڈاکٹر فاروق عبداللہ نے اپنے دو روزہ دورئہ پیرپنچال کے دوران حالیہ دنوں میں بفلیاز میں پیش آئے المناک واقعہ میں زخمی ہوئے شہریوں کی سرنکوٹ کے سرکاری ہسپتال میں عیادت کی۔
ڈاکٹر فاروق نے ہسپتال میں زخمیوں کو بہم پہنچائے جارہے علاج و معالجہ کے بارے میں ڈاکٹر صاحبان سے جانکاری بھی حاصل کی اور زخمیوں سے بات کرتے ہوئے اس دلخراش واقعہ کی تفصیلات جاننے کی بھی کوشش کی۔
سابق وزیر اعلیٰ نے اس موقعے پر واقعہ کی شدید الفاظ میں مذمت کرتے ہوئے کہا کہ ایک مہذب ملک میں ایسے واقعات کیلئے کوئی جگہ نہیں ہے ۔
ڈاکٹر فاروق نے کہاکہ ہم اس واقعہ کی غیر جانبدارانہ ،سریع الرفتار اور اعلیٰ سطحی تحقیقات چاہتے ہیں تاکہ خاطیوں کو قرار واقعی سزا دی جائے ۔ اس کے ساتھ ساتھ ہم حکومت اور قانون نافذ کرنے والے اداروں سے اپیل کرتے ہیں کہ مستقبل میں انسانی حقوق کی بدترین پامالیوں پر مبنی ایسے واقعات پر یکسر روک لگانے کیلئے ٹھوس اور کارگر اقدامات اٹھائے جائیں۔
این سی نائب صدر نے کہا کہ میں یہ معاملہ پارلیمنٹ میں بھی اُجاگر کروں گا اور حکومت کی توجہ اس جانب مبذول کرانے کی پوری کوشش کروں گا تاکہ متاثرین کو انصاف فراہم ہوسکے ۔