جموں//
بی جے پی کے جموں وکشمیر یونٹ کے صدر‘ رویندر رینا کا کہنا ہے کہ پونچھ میں تین افراد کی ہلاکتوں کے ذمہ داروں کو سخت سزا دی جائے گی۔
رینا نے کہا کہ میں لوگوں کو یقین دلانا چاہتا ہوں کہ ان کے ساتھ انصاف کیا جائے گا۔
بی جے پی یونٹ صدر نے ان باتوں کا اظہار جمعہ کو پونچھ میں نامہ نگاروں کے ساتھ بات کرنے کے دوران کیا جہاں وہ۲۲دسمبر کو بفلیاز علاقے میں پر اسرار حالت میں مردہ پائے گئے تین عام شہریوں کے اہل خانہ کے ساتھ اظہار تعزیت کرنے کے لئے گئے تھے ۔
اس موقع پر رینانے میڈیا کے ساتھ بات کرتے ہوئے کہا’’گنہگاروں کو قانون بہت بڑی سزا دے گا ہمارے ملک میں قانون سب سے بڑا ہے قانون سے بڑا کوئی نہیں ہے ‘‘۔
رینا نے کہا’’جن لوگوں نے یہ غلطی کی ہے یہ ایک بڑی غلطی ہے اور قانون اس غلطی کے مرتکبین کو بھی بڑی سزا دے گا‘‘۔
ان کا کہنا تھا’’میں لوگوں کو یقین دلانا چاہتا ہوں کہ آپ کے ساتھ انصاف کیا جائے گا‘‘۔انہوں نے کہا کہ میں آج یہاں لواحقین کے ساتھ تعزیت کرنے اور یہاں کے لوگوں کا دکھ بانٹنے کیلئے آیا ہوں۔