کے ایل راہل نے مشکل حالات میں سنچری بنائی

سنچورین// ہندوستان کے وکٹ کیپر بلے باز کے ایل راہل نے جنوبی افریقہ کے خلاف تین ٹیسٹ میچوں کی سیریز کے پہلے میچ کے دوسرے دن بدھ کو سنچری بنا کر ٹیم کو باعزت اسکور تک پہنچا دیا ہے۔
راہل نے آج کوئتزی کی گیند پر چھکا لگا کر اپنی سنچری مکمل کی۔ انہوں نے 137 گیندوں میں 14 چوکوں اور چار چھکوں کی مدد سے 101 رنز بنائے۔ تحمل سے بلے بازی کرتے ہوئے انہوں نے ہندوستانی ٹیم کو باعزت اسکور تک پہنچایا۔
سنچورین میں راہل کی یہ دوسری سنچری ہے۔ 2021 میں راہل نے اسی میدان پر ٹیسٹ میچ میں سنچری بنائی تھی۔ کے ایل راہل کے ٹیسٹ کیریئر کی یہ آٹھویں سنچری ہے۔ اس کے علاوہ وہ 14 نصف سنچریاں بھی بنا چکے ہیں۔ ان کا بہترین اسکور 199 رنز رہا ہے۔ وہ اپنے ٹیسٹ کیریئر میں تین بار ناٹ آؤٹ رہے ہیں۔
وہ اب تک 48 ٹیسٹ میچ کھیل چکے ہیں اور 82 اننگز میں 34 سے زیادہ کی اوسط سے 2,717 رنز بنا چکے ہیں۔