پونچھ میں بدنام زمانہ منشیات فروش کی جائیداد ضبط:پولیس

جموں//
منشیات کے خلاف جنگ کو جاری رکھتے ہوئے جموں وکشمیر پولیس نے ضلع پونچھ میں ایک بدنام زمانہ منشیات فروش کی لاکھوں روپیے مالیت کی جائیدد ضبط کی ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس نے این ڈی پی ایس ایکٹ کے تحت شاکر الدین ساکن دگوار ترون تحصیل حویلی ضلع پونچھ نامی ایک منشیات فروش کی لاکھوں رویے مالیت کی جائیداد کو ضبط کیا ہے ۔
ترجمان نے کہا کہ ضبط شدہ جائیداد میں۴۵لاکھ۸۶ہزار۱۵رویے مالیت کا ایک یک منزلہ رہائشی مکان‘۳۳لاکھ روپیے کا ایک جے سی بی شامل ہے ۔بیان میں کہا گیا کہ محمد یاسین کا۹لاکھ رویے مالیت کا ایک ٹریکٹر بھی ضبط کیا گیا ہے ۔
ترجمان نے بتایا کہ پونچھ پولیس کی جانب سے کی گئی تفتیش اور انکوائری کے دوران ضبط شدہ رہائشی مکان اور گاڑیوں کی شناخت غیر قانونی طور پر حاصل کی گئی جائیداد کے بطور ہوئی ہے ۔انہوں نے کہا’’یہ جائیداد پہلی نظر میں ماکان کی طرف سے نشہ آور ادویات اور سائیکو ٹراپک مواد کی غیر قانونی سمگلنگ سے حاصل کی گئی تھی۔‘‘
قابل ذکر ہے کہ گذشتہ ماہ این ڈی پی ایس ایکٹ کے تحت مینڈھر میں محمود حسین، ظفر اقبال اور اور جا وید اقبال نامی بدنام زمانہ منشیات فروشوں کی لاکھوں روپیے مالیت کی مشترکہ جائیدادوں کو ضبط کیا گیا تھا۔
پولیس کا کہنا ہے کہ وہ منشیات کے خلاف جنگ کو وسیع پیمانے پر جاری رکھنے کے لئے پر عزم ہے ۔انہوں نے معاشرے سے اس بدعت کی بیخ کنی کو یقینی بنانے کیلئے عوام سے بھر پور تعاون فراہم کرنے کی اپیل دہرائی ہے ۔