جموں/۱۱دسمبر
جموں وکشمیر کے لیفٹیننٹ گورنر منوج سنہا نے پیر کے روز کہا کہ دفعہ 370 پر عدالت عظمیٰ کے فیصلے کے پیش نظر کشمیر میں کسی کو نہ خانہ نظر بند رکھا گیا ہے اور نہ ہی کسی کو گرفتار کیا گیا ہے ۔انہوں نے کہا کہ کچھ لوگ اس قسم کی افواہیں پھیلا رہے ہیں جو بے بنیاد ہیں۔
لیفٹیننٹ گورنر نے ایک پریس بریفنگ کے دوران کہا”کچھ لوگ خانہ نظر بندی اور لوگوں کو گرفتار کرنے کی افواہیں پھیلا رہے ہیں“۔
سنہانے کہا”میں پوری ذمہ داری سے کہتا ہوں کہ سیاسی وجوہات کی بنا پر کسی کو خانہ نظر بند رکھا گیا ہے نہ کسی کو گرفتار کیا گیا ہے “۔
بتادیں کہ پی ڈی پی نے ’ایکس‘ پر پیر کی صبح ایک پوسٹ میں کہا”عدالت عظمیٰ کے فیصلے سے قبل ہی پولیس نے پارٹی صدر محبوبہ مفتی کی رہائش گاہ کے دروازے بند کرکے اس کو خانہ نظر بند کر دیا ہے “۔
دفعہ 370 کی تنسیخ کے خلاف دائر عرضیوں پر عدالت عطمیٰ آج یعنی پیر کو فیصلہ سنایا جس میں دفعہ کی منسوخی کے مرکزی حکومت کے فیصلے کو آئینی طور پر درست قراردیا گیا۔
اس فیصلے کے پیش نظر وادی کشمیر میں سیکورٹی کے فقید المثال انتظامات کئے گئے ہیں۔
