’تمام مطلوبہ دستاویزات کے بغیر کمرشل گاڑیوں کو چلنے کی اجازت نہیں ہوگی‘

سرینگر//
ریجنل ٹرانسپورٹ آفیسر (آر ٹی او) کشمیر‘ سید شہنواز بخاری کا کہنا ہے کہ ان کمرشل گاڑیوں کو سڑکوں پر چلنے کی اجازت نہیں ہوگی جن کے پاس فٹنس سرٹیفکیٹ، درست انشورنس دستاویزات اور روٹ پرمٹ نہ ہو۔
بخاری کہا کہ ڈرائیور حضرات کو چاہئے کہ وہ ان ضروری دستاویزات کو وقت پر رینیو کریں یہ تمام خدمات آن لائن دستیاب ہیں۔
آر ٹی او نے ان باتوں کا اظہار ہفتے کے روز یہاں نامہ نگاروں کے سوالوں کے جواب دینے کے دوران کیا۔
بتادیں کہ محکمہ ٹرانسپورٹ جموں وکشمیر نے ایک حکمناہ جاری کیا ہے جس کے مطابق درست فٹنس سرٹیفکیٹ اور مناسب روٹ پرمٹ نہ رکھنے والی مسافر بر دار گاڑیوں کی تمام خدمات معطل کی جائیں گی۔
اس حکمنامے کے بارے میں بات کرتے ہوئے بخاری نے کہا کہ یہ کوئی نیا حکمنامہ نہیں ہے ۔انہوں نے کہا’’کمرشل گاڑیوں کے پاس لازماً فٹنس سرٹیفکیٹ، انشورنس دستاویزات، روٹ پرمٹ ہونے چاہئے ان دستاویزات کے بغیر ان گاڑیوں کو سڑکوں پر چلنے کی اجازت نہیں دی جائے گی‘‘۔
بخاری کا کہنا تھا’’حادثوں کے بعد ان گاڑیوں میں سفر کرنے والے مسافر انشورنس کلیم نہیں کر پا رہے ہیں اور ان کو دیگر لوازمات کی ادائیگی کے لئے دقتوں کا سامنا کرنا پڑتا ہے ‘‘۔
آر ٹی او نے ڈرائیور حضرات سے کہا کہ وہ ان دستاویزات کی معیاد ختم ہونے سے قبل ہی تجدید کرائیں۔انہوں نے کہا کہ ان دستاویزات کی تجدیدکیلئے تمام خدمات آن لائن دستیاب ہیں۔
اوور لوڈنگ کے بارے میں پوچھے گئے ایک سوال کے جواب میں ان کا کہنا تھا کہ ٹریفک حکام قوانین کی خلاف ورزی کرنے والوں کے خلاف کارروائی کر رہے ہیں۔
بخاری کہا کہ جن علاقوں سے اوور لوڈنگ کی شکایتیں آتی ہیں ان میں چلنی والی گاڑیوں میں اضافہ کیا جاتا ہے کیونکہ گاڑیوں کی کمی ہی اوور لوڈنگ کی بنیادی وجہ ہے ۔انہوں نے کہا کہ یہاں پبلک ٹرانسپورٹ کی کمی ہے تاہم شہر میں سمارٹ سٹی پروجیکٹ کے تحت گاڑیوں کو شروع کیا گیا ہے ۔ان کا کہنا تھا کہ محکمہ ان مسائل کو حل کرنے کیلئے کوشاں ہے ۔