کشتواڑ:جعلی ڈومیسائل سرٹیفکیٹ اجرا کرنے کے الزام میں تین افراد کے خلاف مقدمہ درج

جموں//
پولیس نے جموں کشمیر کے ضلع کشتواڑ میں ایک روہنگیا خاتون کو ڈومیسائل سرٹیفیکٹ جاری کرنے کے الزام میں تین افراد کے خلاف ایک مقدمہ درج کیا ہے ۔
ایس ایس پہ کشتواڑ‘ خلیل پوسوال نے اس سلسلے میں میڈیا کو تفصیلات فراہم کرتے ہوئے کہا کہ کشتواڑ کے دچھن پولیس اسٹیشن کے حدود میں آنے والے علاقے میں کچھ روہنگیا افراد رہتے ہیں جن کی خواتین نے مقامی لوگوں کے ساتھ شادی کی ہے اور اب بچوں کے ساتھ رہ رہی ہیں۔
پوسوال نے کہا کہ ایک روہنگیا خاتون کے شوہر نے انتظامیہ کو گمراہ کرکے اپنی بیوی کیلئے ڈومیسائل سرٹیفکیٹ بنایا جو جعلی ہے ۔
ان کا کہنا تھا کہ ہم نے اس سلسلے میں پولیس اسٹیشن دچھن میں متعلقہ دفعات کے تحت ایک کیس درج کرکے تحقیقات شروع کی ہیں۔
ایس ایس پی نے کہا کہ جس اتھارٹی نے سرٹیفکیٹ اجرا کی ہے ، سہولیت کار اور ملزم خاتون کے خلاف مقدمہ درج کیا گیا ہے ۔انہوں نے کہا کہ جو بھی اس میں ملوث ہوگا اس کے خلاف تحت قانون کارروائی کی جائے گی۔
قصبے میں رہنے والے دوسری جگہوں کے لوگوں کے بارے میں پوچھے جانے پر ان کا کہنا تھا کہ جو بھی یہاں دوسرے علاقوں سے آتے ہیں تو اس کو ہدایت ہے کہ وہ متعلقہ پولیس اسٹیشن پر رپورٹ کریں۔انہوں نے کہا کہ مکان مالکان کو بھی چاہئے کہ وہ کرایہ داروں کے متعلق پولیس کو مطلع کریں۔