پٹواری حلقہ شریف آباد کو رنگے ہاتھوں گرفتار کیا گیا

سرینگر//
اینٹی کرپشن بیورو (اے سی بی) نے جمعرات کے روز پٹواری حلقہ شریف آباد بڈگام عاشق حسین کو دس ہزار روپے کی رشوت لیتے ہوئے رنگے ہاتھوں دھر دبوچ کر سلاخوں کے پیچھے دھکیل دیا۔
اے سی بی کے ایک ترجمان نے بتایا کہ اینٹی کرپشن بیورو میں ایک شخص نے تحریری طورپر شکایت درج کی کہ عاشق حسین پٹواری حلقہ شریف آباد بڈگام آن لائن ریکارڈ کے اندراج کی خاطر دس ہزار روپیہ کی رشوت طلب کر رہا ہے ۔
شکایت موصول ہوتے ہی اینٹی کرپشن بیورو نے اس ضمن میں۲۰۲۳/۲۱زیر دفعات۷پی سی ایکٹ کے تحت کیس درج کرکے تحقیقات شروع کی۔
ترجمان نے بتایا کہ اینٹی کرپشن بیورو کی سرینگر ٹیم نے ایک جال بچھایا جس دوران پٹواری عاشق حسین کو شکایت کنندہ سے دس ہزار روپے کی رشوت لیتے ہوئے رنگے ہاتھوں گرفتار کیا گیا۔
ترجمان نے مزید بتایا کہ آزاد گواہوں کی موجودگی میں رشوت خور پٹواری کے قبضے سے دس ہزار روپیہ کی رقم برآمد کی گئی ہے ۔