نئی دہلی///
وزیر اعظم نریندر مودی نے منگل کو کہا کہ ہندوستان کی سفارت کاری نے گزشتہ ۳۰ دنوں میں نئی بلندیوں کو چھو لیا ہے اورجی ۲۰ سربراہی اجلاس کے دوران لئے گئے کچھ فیصلے ۲۱ویں صدی کی دنیا کی سمت کو تبدیل کرنے کی صلاحیت رکھتے ہیں۔
یہاں جی ۲۰ یونیورسٹی کنیکٹ کے فائنل میں طلباء ، فیکلٹی ممبران اور تعلیمی اداروں کے سربراہان سے خطاب کرتے ہوئے وزیراعظم نے کہا کہ انہوں نے گزشتہ۳۰ دنوں کے دوران ۸۵ عالمی رہنماؤں سے ملاقات کی۔
مودی کاکہنا تھا’’آج کے پولرائزڈ بین الاقوامی ماحول میں، اتنے سارے ممالک کو ایک پلیٹ فارم پر اکٹھا کرنا کوئی چھوٹی بات نہیں ہے‘‘۔ انہوں نے اس ماہ کے شروع میں دہلی میں ہونے والی جی۲۰ سربراہی کانفرنس کا حوالہ دیتے ہوئے کہا۔
وزیر اعظم نے زور دے کر کہا کہ ملک کی ترقی کے سفر کو جاری رکھنے کے لیے صاف اور مستحکم گورننس ضروری ہے۔
مودی نے کہا’’میں آپ کو پچھلے۳۰ دنوں کا ایک رپورٹ کارڈ دینا چاہتا ہوں۔ اس سے آپ کو نئے ہندوستان کی رفتار اور پیمانے کا اندازہ ہو جائے گا۔ آپ کو ۲۳؍ اگست یاد ہوگا! سب دعا کررہے تھے اور پھر اچانک سب کے چہرے پر مسکراہٹ آگئی۔ پوری دنیا نے ہندوستان کی آواز سنی: ’انڈیا چاند پر ہے‘۔انہوں نے کہا’’۲۳؍ اگست قومی خلائی دن کے طور پر ملک میں امر ہو گیا ہے۔ اپنے قمری مشن کی کامیابی کے فوراً بعد، ہندوستان نے اپنا شمسی مشن شروع کیا‘‘۔
اس بات پر زور دیتے ہوئے کہ ہندوستان کی سفارت کاری گزشتہ ۳۰ دنوں میں نئی بلندیوں پر پہنچی ہے، وزیر اعظم نے کہا کہ جی۲۰سربراہی اجلاس صرف ایک سفارتی اور دہلی مرکوز پروگرام تک محدود ہوسکتا تھا لیکن ہندوستان نے اسے عوام پر مبنی قومی تحریک بنا دیا۔
وزیر اعظم نے کہا کہ ہندوستان کی کوششوں سے چھ مزید ممالک برکس کمیونٹی میں شامل ہوئے ہیں۔ان کاہکنا تھا’’دہلی کے اعلان پر ۱۰۰ فیصد اتفاق رائے نے عالمی شہ سرخیاں بنائیں…جی ۲۰ سربراہی اجلاس کے دوران لئے گئے کچھ فیصلے۲۱ویں صدی کی سمت کو تبدیل کرنے کی صلاحیت رکھتے ہیں…آج کے پولرائزڈ بین الاقوامی ماحول میں، یہ کوئی چھوٹی بات نہیں ہے کہ اتنے سارے ممالک ایک ساتھ ایک پلیٹ فارم مل جائیں‘‘۔
گزشتہ ۳۰دنوں میں اپنی حکومت کی کامیابیوں کی فہرست دیتے ہوئے وزیر اعظم نے کہا کہ غریبوں، ایس سی، ایس ٹی، او بی سی اور متوسط طبقے کو بااختیار بنانے کے لیے کئی اقدامات کیے گئے۔
وزیر اعظم نے کہا’’حکومت نے کاریگروں کے لیے پی ایم وشوکرما یوجنا شروع کی ہے۔ گزشتہ ۳۰دنوں میں ’روزگار میلہ‘ کے ذریعے ایک لاکھ سے زیادہ نوجوانوں کو مرکزی حکومت کی نوکریاں دی گئی ہیں۔ خواتین ریزرویشن بل پارلیمنٹ کی نئی عمارت میں منظور ہونے والا پہلا بل بن گیا اور اس نے ملک کو فخر کے احساس سے بھر دیا‘‘۔
مودی نے کہا کہ وہ جی۲۰سمٹ کی کامیابی پر حیران نہیں ہیں کیونکہ جب نوجوان کسی بھی تقریب سے وابستہ ہوتے ہیں تو اس کی کامیابی یقینی ہوتی ہے۔ انہوں نے کہا’’نوجوان اسی وقت ترقی کرتے ہیں جہاں پر امید، مواقع اور کشادگی ہو۔ نوجوانوں کے لیے میرا پیغام ہے … ’بڑا سوچو۔‘(ایجنسیاں)