’کوکر ناگ جھڑپ کے بعد بھی وادی کے پر امن ماحول میں کوئی تبدیلی نہیں آئی‘

جموں//
جموںکشمیر کے پولیس سربراہ‘دلباغ سنگھ کا کہنا ہے کہ جموں کشمیر میں کوکرناگ انکائونٹر سے پہلے بھی حالات اچھے تھے اور اس کے بعد بھی حالات اچھے ہیں۔
سنگھ نے ان باتوں کا اظہار منگل کو ضلع ریاسی میں نامہ نگاروں کے سوالوں کے جواب دینے کے دوران کیا۔
ڈی جی پی نے کہا’’جموںکشمیر میں کوکر ناگ انکائونٹر سے پہلے بھی حالات اچھے تھے اور اس کے بعد بھی یہاں حالات اچھے ہیں‘‘۔ان کا کہنا تھا’’دہشت گرد جہاں بھی چھپے ہوتے ہیں چاہئے جنگل میں ہوں یا پہاڑوں پر ان کا پیچھا کرنے کی کوشش کی جاتی ہے‘‘۔ سنگھ نے کہا کہ ’’کوکرناگ انکائونٹر میں بھی کسی خاص دہشت گرد کی کمین گاہ کے بارے میں اطلاع تھی جس کے مطابق سیکورٹی فورسز وہاں گئے تھے‘‘۔
سنگھ نے کہا’’جو فائر پہلے کرتا ہے تو دوسرے کو نقصان اٹھانا پڑتا ہے اس آپریشن کے دوران بدقسمتی سے پہلے دہشت گردوں نے فائر کیا جس کی وجہ سے ہمیں اپنے بہادر افسروں اور ایک بہادر جوان کا نقصان اٹھانا پڑا‘‘۔
پولیس سربراہ کا کہنا تھا کہ دہشت گردی کے صفایا کیلئے اپنی جان کو خطرے میں ڈال کر ایسی جگہ پر جانا کوئی معمولی بات نہیں ہے۔
ڈی جی پی نے کہا کہ یہ ایک کامیاب آپریشن تھا تاہم نقصان کے امکانات رہتے ہیں۔انہوں کہا’’میں اس آپریشن میں شہید ہونے والے جوانوں کو اور اس میں حصہ لینے والے جوانوں کو سلام پیش کرتا ہوں‘‘۔ان کا کہنا تھا کہ سیکورٹی فورسز جموں و کشمیر کی سر زمین سے دہشت گردی جڑیں اکھاڑنے کیلئے پر عزم ہے۔
پولیس سربراہ نے کہا کہ پولیس نے نارکو ٹیرر کے خلاف لڑائی کو تیز تر کر دیا ہے۔انہوں نے کہا’’پولیس نے نارکو ٹیرر کے خلاف لڑائی کو تیز تر کر دیا ہے گرفتاریوں، کیسوں کے اندراج میں اضافہ درج ہو رہا ہے۔‘‘