سری لنکا نے پاک بھارت میچز کی میزبانی کے لیے پیشکش کردی

لاہور: سری لنکا نے پاک بھارت میچز کی میزبانی کے لیے پیشکش کردی۔
ایک انٹرویو میں بورڈ کے میڈیکل پینل چیف پروفیسر ارجنا ڈی سلوا نے کہا کہ ایشیا کپ کا کامیاب انعقاد کرنے کے بعد پاک بھارت میچز کی میزبانی کرکے ہمیں بہت خوشی محسوس ہوگی،ہم افغانستان کی تمام ہوم سیریز کیلیے بھی نیوٹرل وینیو کے طور پر اپنے گراؤنڈز کی پیشکش کرتے ہیں، ہمارے کرکٹ شائقین ان ملکوں کے کرکٹرز سے خاصا لگاؤ رکھتے ہیں۔
انھوں نے کہا کہ پاکستان اور بھارت کی ٹیمیں ایک دوسرے کے ملکوں کا دورہ نہیں کرتیں، سری لنکا باہمی مقابلوں کیلیے بہترین میزبان ثابت ہوسکتا ہے، بورڈ کے صدر باضابطہ طور پر ان ملکوں کو اپنے وینیوز کی پیشکش کریں گے۔
یاد رہے کہ ماضی میں سیکیورٹی مسائل کی وجہ سے پاکستان اپنی بیشتر ہوم سیریز کی میزبانی یواے ای میں کرتے رہا ہے، اب ملکی میدان آباد ہو چکے البتہ ایشیا کپ کیلیے بھارتی ٹیم نے آنے سے انکار کر دیا تھ، اس وجہ سے 9میچز کا سری لنکا میں انعقاد کیا گیا،سخت گرم موسم کے پیش نظر دبئی کو زیرغور نہیں لایا گیا تھا۔