خدمت سینٹر آپریٹروں کا سری نگر میں احتجاج

سرینگر//
خدمت سینٹر آپریٹروں نے بدھ کے روز یہاں پریس کالونی میں جمع ہو کر ایک بار پھر اپنے مطالبات کو لے کر احتجاج درج کیا۔
احتجاجیوں نے بینرس اٹھا رکھے تھے اور وہ’جاب پالیسی لاگو کرو‘وغیرہ جیسے نعرے لگا رہے تھے ۔
اس موقع پر وسیم احمد نامی ایک احتجاجی نے میڈیا کے ساتھ بات کرتے ہوئے کہا کہ ہم اس لئے احتجاج کر رہے ہیں تاکہ ہمارے کچھ مسائل ہیں جو اجاگر ہو سکیں۔
احمدنے کہا’’ہمارے مسائل کی طرف نہ جموں کشمیر بینک اور نہ ہی جموں وکشمیر سرکار توجہ دے رہی ہے ‘‘۔ان کا کہنا تھا کہ بی سی رول آئوٹ کیا جا رہا ہے ہم اس کے خلاف احتجاج کر رہے ہیں کیونکہ اسی پر اب ہمارا تھوڑا بہٹ روز گار چل رہا تھا۔
احتجاجی نے کہا’’بزنس ٹرانسفر پالیسی واپس لی گئی اس کا حق ہمیں واپس دیا جانا چاہئے اور سال۲۰۲۰میں ہمیں وزیر اعظم کے دفتر سے جاب پالیسی بنانے کی یقین دہانی کی گئی تھی لیکن ہم ابھی بھی اس کے انتظار میں ہیں۔‘‘
احتجاجیوں نے لیفٹیننٹ گورنر منوج سنہا سے مداخلت کرکے ان کے مسائل کو حل کرنے کی اپیل کی۔