کرکٹ ورلڈکپ کا فائنل پاکستان اور آسٹریلیا کھیلیں گے: مچل مارش کی پیشگوئی

سڈنی// آئی سی سی ورلڈکپ کے لیے آسٹریلوی اسکواڈ میں شامل آل راؤنڈر مچل مارش نے پیشگوئی کی ہے کہ ورلڈکپ کا فائنل پاکستان اور آسٹریلیا کی ٹیمیں کھیلیں گی۔
حال ہی میں ایک یوٹیوب پوڈکاسٹ میں مچل مارش نے سابق آسٹریلوی اوپنر ایڈم گلکرسٹ اور انگلینڈ کے سابق کپتان مائیکل وان کی مشترکہ میزبانی میں شرکت کی۔
دوران بات چیت مائیکل وان نے آسٹریلیا کا نام لیے بغیر کرکٹر سے سوال کیا کہ ورلڈکپ کون جیتنے والا ہے، بھارت، پاکستان یا انگلینڈ؟ جس پر مچل مارش نے جواب دیتے ہوئے کہا کہ میں ایمانداری سے سمجھتا ہوں کہ فائنل میں آسٹریلیا اور پاکستان مدمقابل ہوں گے ۔
مچل کا جواب سن کر ایڈم گلکرسٹ نے اسے اچھا جواب قرار دیا جب کہ مائیکل وان نے ہنستے ہوئے کہا کہ ہندوستان کو یہاں سے نکال ہی دیا۔
اس سے قبل سابق آسٹریلوی کرکٹر گلین میک گرا، انگلش کپتان آئن مورگن نے بھی پاکستان، آسٹریلیا، انگلینڈ اور بھارت کے سیمی فائنل میں پہنچنے کی پیشگوئی کی تھی جب کہ سابق جنوبی افریقی بیٹر اے بی ڈی ویلیئرز نے جنوبی افریقا کو فہرست میں جگہ دی تھی، ساتھ ہی انہوں نے ورلڈکپ میں بابر اعظم کو پاکستان کے لیے اہم کھلاڑی قرار دیا تھا۔
واضح رہے کہ ون ڈے ورلڈکپ 2023 اکتوبر اور نومبر میں ہندوستان میں کھیلا جائے گا، جس میں 10 ٹیمیں حصہ لیں گی جب کہ میگا ایونٹ کا آغاز 5 اکتوبر سے ہوگا اور فائنل 19 نومبر کو کھیلا جائے گا۔
پاکستان اور ہندوستان کا میچ 14 اکتوبر کو نریندر مودی اسٹیڈیم میں کھیلا جائے گا۔
ادھر اکستانی کرکٹ قومی ٹیم کے کپتان بابر اعظم نے کہا ہے کہ سوچ لیا ہے کہ ورلڈ کپ میں کن کھلاڑیوں کے ساتھ جانا ہے۔
ایشیا کپ میں ہندوستان کے خلاف میچ سے قبل پریس کانفرنس کرتے ہوئے کپتان بابر اعظم نے کہا کہ دل ٹوٹنے سے کوئی فرق نہیں پڑتا، ورلڈ کپ میں جو ٹیم کے لیے بہتر ہوتا وہی کریں گے۔
انہوں نے کہا کہ ڈھائی ماہ سے سری لنکا میں کھیل رہے ہیں ہندوستان کے خلاف ہمیں برتری حاصل ہوگی۔
بابر اعظم نے کہا کہ کولمبو میں سورج نکل گیا ہے لگتا نہیں بارش ہوگی، کل کے لیے میچ میں اچھی کارکردگی دکھانے کی کوشش کریں گے۔
بابر اعظم نے کہا کہ ہمارا فوکس اکٹھے رہنے، میچز اور ٹورنامنٹ جیتنے پر ہوتا ہے، ورلڈ کپ کے لیے ایشیا کپ کو دیکھ رہے ہیں، ہم اپنا اسکواڈ تقریباً بنا چکے ہیں اور ٹیم کی بہتری کے لیے سب کام کرتے ہیں۔
انہوں نے مزید کہا کہ پلیئرز کے دل ٹوٹنے والی بات نہیں، جو بھی منتخب ہوں گے وہ بہترین ہی ہوں گے، میچز اور ٹورنامنٹ فاسٹ بولرز جتواتے ہیں اور مجھے ان پر یقین ہے، ہر میچ میں ہر کوئی پرفارم نہیں کرسکتا۔
یاد رہے کہ ایشیا کپ کے سپر فور مرحلے میں کل پاک بھارت میچ کولمبو میں شیڈول ہے۔