جموں///
ڈیموکریٹک پروگریسو آزاد پارٹی(ڈی پی اے پی) کے چیئرمین اور سابق وزیر اعلیٰ غلام نبی آزاد نے بدھ کو کہا کہ جموں کشمیر واپس آنے کا ان کا مقصد لوگوں کے مصائب کوکم کرنا اور مرکز کے زیر انتظام علاقے کو دنیا کی اعلیٰ معیشتوں میں سے ایک بنانا ہے۔
وادی چناب کے اپنے ۱۰ روزہ دورے کے دوران آزاد نے پرانو، کھیلانی اور بھدروا ہ میں۳عوامی جلسوں سے خطاب کیا۔
اس موقعہ پر کئی لوگوں نے ڈی پی اے پی میں شمولیت اختیار کی اور پارٹی کے عوام نواز ایجنڈے کو آگے بڑھانے کا فیصلہ کیا۔
آزاد نے کہا کہ یوٹی کی زیادہ تر اقتصادی صلاحیتوں کا استعمال نہیں کیا گیا ہے اور سخت اور متنوع جغرافیائی خطوں کے پیش نظر اس کے زیادہ تر علاقے غیر دریافت ہیں۔
سابق وزیر اعلیٰ نے کہا’’اگر صرف ڈوڈہ ضلع کے وسائل اور صلاحیت کو استعمال میں لایا جائے اور تلاش کیا جائے تو یہ مقامی نوجوانوں کیلئے بے پناہ روزگار پیدا کرے گا‘‘۔انہوں نے کہا کہ بھدرواہ کو منی کشمیر کے طور پر جانا جاتا ہے اور میں آپ سے وعدہ کرتا ہوں کہ اگر وہ اقتدار میں آئے تو یہ معاشی سرگرمیوں کا مرکز بن کر ابھرے گا۔
ڈی پی اے پی کے چیئر مین نے کہا کہ کشمیر میں سیاحوں کی آمد کے بعد یہ بھدرواہ ہے جو بالی ووڈ کو شوٹنگ کے لیے راغب کرتا ہے۔ انہوں نے علاقے کو نظر انداز کرنے کیلئے یکے بعد دیگرے حکومتوں پر افسوس کا اظہار کیا اور کہا کہ انہوں نے بطور وزیر اعلیٰ اور مرکزی وزیر صحت کے طور پر جو کچھ بھی کیا وہ زمینی سطح پر ظاہر ہوتا ہے۔انہوں نے کہا یہی وجہ ہے کہ میں نے قومی سیاست کو خیرباد کہہ دیا اور اپنے لوگوں کی خدمت کے لیے ان کے پاس واپس آیا۔
آزاد نے کھلانی علاقے میں ایک بڑے اجتماع سے بھی خطاب کیا جہاں سینکڑوں لوگ ڈی پی اے پی میںشامل ہوئے۔