کرکٹ ورلڈ کپ کے لئے ای ٹکٹ کا اجراء نہیں ہوگا

ممبئی//
بھارتی کرکٹ بورڈ کا کہنا ہے کہ آئی سی سی کرکٹ ورلڈ کپ کے لیے ای ٹکٹ کا اجراء نہیں ہو گا۔
بھارتی کرکٹ بورڈ کے سیکریٹری جے شاہ نے کہا ہے کہ تماشائیوں کے لیے ای ٹکٹ کی سہولت نہیں ہو گی اور کرکٹ شائقین کو ٹکٹس اپنے ساتھ رکھنا ہوں گے۔
جے شاہ نے کہا ہے کہ احمد آباد اور لکھنؤ جیسے بڑی گنجائش والے اسٹیڈیمز کے لیے میگا ایونٹس کے دوران ای ٹکٹس ممکن نہیں، 7 سے 8 سینٹرز پر فزیکل ٹکٹس ایڈوانس میں دستیاب ہوں گے۔
انہوں نے کہا ہے کہ انٹرنیشنل کرکٹ کونسل کے ساتھ مل کر جلد ٹکٹس کی بکنگ کی تاریخوں کا اعلان کریں گے۔
بھارتی کرکٹ بورڈ کے سیکریٹری نے کہا ہے کہ پارٹنرز کے ساتھ مل کر اسٹیڈیم میں میچ دیکھنے والوں کو مفت پانی فراہم کیا جائے گا چاہے وہ بوتل میں ہو یا گلاس میں لیکن فراہم کیا جانے والا پانی مفت ہی ہو گا۔
انہوں نے مزید کہا کہ صحت مندانہ ماحول اور صفائی ستھرائی اس وقت ٹاپ ایجنڈا ہے۔
واضح رہے کہ اس مرتبہ کرکٹ ورلڈ کپ بھارت میں کھیلا جائے گا اور میگا ایونٹ میں پاک بھارت میچ 15 اکتوبر کو شیڈول ہے۔
اس دوران بھارتی کرکٹ بورڈ (بی سی سی آئی) نے پاکستان اور بھارت کے میچ اور ورلڈ کپ 2023ء کی تیاریوں سے متعلق میٹنگ بلالی ہے۔
بھارتی میڈیا رپورٹ کے مطابق اجلاس میں ریاستی کرکٹ ایسوسی ایشنز کے نمائندوں کو شرکت کی دعوت دی گئی ہے، اہم معاملات پر میٹنگ کل نئی دلی میں ہوگی۔
رپورٹ کے مطابق میٹنگ میں پاک بھارت ٹاکرا ری شیڈول کرنے کی تجویز پر تبادلہ خیال کیا جائے گا، سیکیورٹی خدشات کی وجہ سے پاک بھارت میچ 14 اکتوبر کو کرانے کی تجویز دی گئی ہے۔
بھارتی میڈیا رپورٹ کے مطابق پاک بھارت میچ کو نوراتری تہوار کی وجہ سے ری شیڈول کرنے کا کہا گیا ہے، ورلڈ کپ کا یہ اہم ترین میچ نریندرا مودی اسٹیڈیم میں 15 اکتوبر کو شیڈول ہے۔