مودی نے نوتعمیر شدہ کنونشن-ایگزیبیشن سنٹر میں ہون پوجن کیا، کارکنوں کا بھی اعزاز

نئی دہلی//وزیر اعظم نریندر مودی نے بدھ کو دارالحکومت کے پرگتی میدان میں نو تعمیر شدہ بین الاقوامی نمائش-کم-کنونشن سینٹر (آئی ای سی سی) کمپلیکس میں پوجا ارچنا کی اور مرکز کی تعمیر میں شامل کارکنوں کو اعزاز سے نوازا۔
ایک ٹویٹ میں مسٹر مودی نے کہا، "دہلی کو ایک جدید اور مستقبل پر مبنی بین الاقوامی نمائش-کم-کنونشن سینٹر مل گیا ہے ، جو ہندوستان میں کنونشن ٹورازم کو فروغ دے گا اور پوری دنیا کے لوگوں کو اپنی طرف متوجہ کرے گا۔ مرکز کے اقتصادی اور سیاحت سے متعلق فوائد بھی کئی گنا ہوں گے ۔
پرگتی میدان میں تقریباً 123 ایکڑ کے رقبے کے ساتھ آئی ای سی سی کیمپس ہندوستان میں اس طرح کی سب سے بڑی سہولت ہے ۔ اسے 2700 کروڑ روپے کی لاگت سے ایک قومی پروجیکٹ کے طور پر تیار کیا گیا ہے ۔
ستمبر میں اس کمپلیکس میں ہندوستان کی صدارت میں جی 20 سربراہی اجلاس ہونے والا ہے ۔ کہا جاتا ہے کہ یہ کمپلیکس ملک میں بڑی میٹنگوں، کانفرنسوں اور نمائشوں کی میزبانی کے لیے عالمی معیار کا بنیادی ڈھانچہ تیار کرنے کے مودی حکومت کے وژن کا نتیجہ ہے ۔
اس کمپلیکس میں کنونشن سینٹر، نمائشی ہال، اوپن ایئر تھیٹر جیسی بہت سی جدید ترین سہولیات تیار کی گئی ہیں۔ اس کے عظیم الشان کثیر المقاصد ہال اور کنونشن ہال میں سات ہزار افراد کی مشترکہ گنجائش ہے جو آسٹریلیا کے مشہور سڈنی اوپیرا ہاؤس کے بیٹھنے کی گنجائش سے زیادہ ہے ۔ ایمفی تھیٹر 3,000 افراد کے بیٹھنے کی گنجائش سے لیس ہے ۔
کنونشن سینٹر کا فن تعمیر ہندوستانی روایات سے متاثر ہے اور جدید سہولیات اور طرز زندگی کو اپناتے ہوئے اپنے ماضی پر ہندوستان کے اعتماد اور پختہ یقین کی عکاسی کرتا ہے ۔