رام بن: فوجی گاڑی پر درخت گرنے سے ۲ فوجی زخمی

رام بن//
جموںکشمیر کے ضلع رام بن کے نچلانہ علاقے میں جمعرات کی صبح فوجی گاڑی پر درخت گر آنے کے نتیجے میں اس میں سوار دو فوجی اہلکار زخمی ہو گئے۔
ذرائع نے بتایا کہ یہ واقعہ ضلع رام بن کے نچلانہ علاقے میں سرینگر جموں شاہراہ پر پیش آیا اور ایک فوجی گاڑی پر اچانک ایک درخت گر آیا جس کے نتیجے میں ۲؍ اہلکار زخمی ہو گئے۔
ذرائع نے مزید بتایا کہ زخمی ہوئے اہلکاروں کو فوری طور پر علاج و معالجے کیلئے سب ضلع ہسپتال بانہال منتقل کیا گیا، جہاں ان کا علاج و معالجہ کیا جا رہا ہے۔ فوری طور پر زخمی ہوئے اہلکاروں کو شناخت نہیں ہو پائی۔
یاد رہے کہ سرینگر جموں شاہراہ پر آئے روز ٹریفک حادثات، مٹی کے تودے گر آنے، چٹانین کھسکنے اور سڑک سے پھسل کر گاڑیاں لڑھک جانے کے سبب لوگوں کی جانیں تلف ہو جاتی ہیں، اس طرح کے اکثر واقعات ہائی وے پر ضلع رام بن میں پیش آتے ہیں۔ ان حادثات میں نہ صرف قیمتی جانوں کا زیاں ہوتا ہے بلکہ ان حادثات میں بعض اوقات زخمی ہوئے افراد عمر بھر کے لیے معذور ہو جاتے ہیں۔
سرینگر جموں شاہراہ وادی کشمیر کیلئے شہہ رگ کی حیثیت رکھتی ہے اور موسمی خرابی کے سبب اکثر و بیشتر ٹریفک کے لیے بند رہتی ہے۔ زیادہ دیر تک شاہراہ بند رہنے سے وادی میں غذائی اجناس کی قلت ہو جاتی ہے۔ سرینگر جموں شاہراہ کو پورے سال قابل آمد ورفت بنانے کے لیے ایک دہائی سے بھی زیادہ عرصہ قبل شاہراہ کی کشادگی کا کام شروع کیا گیا تاہم سینکڑوں کروڑ روپے خرچ کیے جانے کے باوجود شاہراہ ویسی کی ویسی ہے۔
اس دوران وسطی کشمیر کے گاندربل ضلع کے سونمرگ علاقے میں جمعرات کو ایک سڑک حادثے میں دو افراد زخمی ہو گئے۔
ایک اہلکار نے بتایا کہ سونمرگ میں ایک حادثہ اُس وقت پیش آیا، جب ایک کار دوسری گاڑی سے ٹکرا گئی، جس کے نتیجے میں دو افراد زخمی ہوئے۔
زخمی افراد کی شناخت قدرت فاروق دختر شیخ فاروق ساکنہ کرن نگر اور عاقب نصیر ولد نصیر آہ میر ساکن عمر آباد سری نگر کے طور پر ہوئی ہے۔انہوں نے بتایا کہ دونوں کو علاج کے لیے قریبی اسپتال منتقل کیا گیا جہاں سے قدرت کو مزید علاج کے لیے صورہ میڈیکل انسٹچوٹ ریفر کر دیا گیا۔