فائر اینڈ ایمرجنسی کی اسامیوں کے امیدواروں کا سری نگر میں احتجاج

سرینگر//
فائر اینڈ ایمرجنسی کی اسامیوں کے امیدواروں نے جمعرات کو ایک بار پھر یہاں پریس کالونی میں جمع ہو کر احتجاج درج کیا۔
احتجاجی اپنے مطالبات کے حق میں جم کر نعرہ بازی کر رہے تھے جس دوران کچھ احتجاجیوں کو حراست میں بھی لیا گیا۔
اس موقع پر سمیر احمد نامی ایک احتجاجی نے میڈیا کے ساتھ بات کرتے ہوئے کہا کہ ہم پچھلے تین برسوں سے کبھی یہاں تو کبھی جموں میں احتجاج کر رہے ہیں لیکن انتظامیہ نے اپنی آنکھوں پر پٹی باندھ رکھی ہے ۔
احمد نے کہا’’لیفٹیننٹ گورنر صاحب نے دسمبر۲۰۲۲میں ایک کمیٹی تشکیل دی تھی تاکہ سلیکشن لسٹ میں ہوئی دھاندلیوں کو دیکھا جا سکے ‘‘۔
احمد کا کہنا تھا’’اس کمیٹی کو۱۲جنوری۲۰۲۳کو اپنی رپورٹ پیش کرنی تھی لیکن ۸مہینے گذر جانے کے باجود بھی وہ رپورٹ اب تک پیش نہیں کی گئی‘‘۔
احتجاجی نے کہا کہ ہمارا مطالبہ ہے کہ اس رپورٹ کو پیش کیا جائے ۔