مہتا نے سمارٹ سٹی پروجیکٹوں کی پیش رفت کا جائزہ لینے کیلئے شہر کا شبانہ دورہ

سرینگر//
چیف سیکریٹری‘ ڈاکٹر ارون کمار مہتا نے بدھ وار کوشام دیر گئے سرینگر شہر کا دورہ کیا تاکہ سرینگر سمارٹ سٹی لمٹیڈ کے تحت جاری کاموں کی ڈبل شفٹ کا جائزہ لیا جاسکے۔
دورے کے آغاز زیر تعمیر روایتی سوق مارکیٹ اور کرافٹ سینٹر سے ہوا۔ اس کے بعد بٹہ مالو کے سول لائنز ایئریا ، گھنٹہ گھر اور ایم اے روڈ پر کھیل میدان کا دورہ کیا۔
چیف سیکریٹری کوجانکاری دی گئی کہ سوق مارکیٹ پروجیکٹ کا مقصد اَپنے ثقافتی اور تعمیراتی ورثے کو محفوظ رکھتے ہوئے جدید اِنفراسٹرکچر اور سہولیات کو مربوط کر کے روایتی دستکاری کو بحال کرنا ہے ۔اُنہوں نے کہا کہ جاری کام اِس بات کو یقینی بنائے کہ ڈیزائن ایک متحرک اور پُر کشش بازار بنانے کے ویژن کے مطابق ہو۔
ڈاکٹر مہتا نے شہر کے بنیاد ی ڈھانچے میں سمارٹ عناصر کو شامل کرنے کیلئے اُٹھائے گئے اقدامات جیسا انٹلی جنٹ لائٹنگ سسٹم ، ویسٹ مینجمنٹ سہولیات اور ڈیجیٹل کنکٹویٹی کا بھی جائزہ لیا تاکہ خریداری کے مجموعی تجربے کو بڑھایا اور شہر میں دیر پا طریقوں کو فروغ دیا جاسکے۔
چیف سیکریٹری نے بٹہ مالو کا بھی دورہ کیا اور اُنہوں نے وہاں شہری ترقی کے مختلف کاموں کا معائنہ کیا ۔اُنہوں نے ان اقدامات کی پیش رفت کا جائزہ لیا جن کا مقصد شہری عبور ومرور جیسے انٹلی جنٹ ٹرانسپورٹیشن سسٹم کی ترقی اور پیدل چلنے والوں کیلئے اِنفراسٹرکچر بشمول سمارٹ پبلک ٹرانسپورٹیشن سسٹم‘جی پی ایس سے چلنے والی بسیں،ڈیجیٹل ٹکٹنگ کی خدمات اور بروقت مسافروں کی معلومات کے نظام کو بہتر بنانا ہے۔
مزید برآں ، چیف سیکریٹری نے سائیکلنگ ٹریکس کی تعمیر‘بھیڑ کو کم کرنے اور علاقے میں ٹرانسپورٹیشن کے مجموعی نیٹ ورک کو بڑھانے کیلئے سمارٹ ٹریفک مینجمنٹ سلو شنز کے اِنضمام کا جائزہ لیا۔
چیف سیکریٹری نے گھنٹہ گھر کے تاریخی مقام کا دورہ کیا ۔ اُنہوں نے سمارٹ سٹی پروجیکٹ کے حصے کے طور پر جاری بحالی او رتحفظ کی کوششوں کا معائنہ کیا ۔اُنہوں نے کہا کہ علاقے کے روایتی فن تعمیر اور ورثے کو جدید سہولیات سے سمارٹ سلوشنز کے ساتھ شامل کیا جانا چاہئے۔
ڈاکٹر مہتا نے ثقافتی ورثہ کے تحفظ کے منصوبوں کی پیش رفت کا بھی جائزہ لیا جس میں پرانی عمارتوں کی تزئین و آرائش اور گھنٹہ گھر کی اس تاریخی یاد گار کے اِرد گرد عوامی مقامات کی خوبصورتی شامل ہے ۔ اُنہوں نے کہا کہ موجودہ کوششوں کا مقصد علاقے کی تاریخی اہمیت کو برقرار رکھنا، سیاحت کو راغب کرنا اور شہری کے مرکز اور اس کے آس پاس کے رہائشیوں اور سیاحوں کیلئے بصری طور پر پُر کشش ماحول پیدا کرنا ہے۔
اِس موقعہ پر بتایا گیا کہ سری نگر کو ایک سمارٹ اور دیر پا شہر میں تبدیل کرنے کے لئے حکومت کا عزم واضح ہے۔