ایجنسیاں
جموں؍۲۴ جون
وائٹ نائٹ کور کے جنرل آفیسر کمانڈنگ لیفٹیننٹ جنرل پی کے مشرا نے بدھ کے روز جموں و کشمیر کے ضلع راجوری میں واقع رومیو فورس ہیڈکوارٹرز کا دورہ کیا اور جاری انسدادِ دہشت گردی کارروائیوں کا جائزہ لیا۔
سرحدی ضلع راجوری کے مختلف علاقوں، بشمول دوریمل اور گمبھیر مغلاں کے جنگلاتی خطوں میں گزشتہ ایک ماہ سے فوجی دستے دہشت گرد مخالف کارروائیوں میں مصروف ہیں۔
جموں میں قائم وائٹ نائٹ کور نے سوشل میڈیا پلیٹ فارم ایکس پر جاری ایک بیان میں کہا کہ ’’جی او سی وائٹ نائٹ کور نے ہیڈکوارٹرز کاؤنٹر انسرجنسی فورس (رومیو) کا دورہ کیا جہاں انہوں نے موجودہ سکیورٹی ماحول کا جائزہ لیا اور آپریشنل تیاریوں کا معائنہ کیا۔‘‘
بیان کے مطابق لیفٹیننٹ جنرل مشرا نے تمام افسران اور جوانوں کی پیشہ ورانہ مہارت، فرض شناسی اور انسدادِ دہشت گردی کارروائیوں میں ان کی مسلسل وابستگی کو سراہا۔
انہوں نے جوانوں کے بلند حوصلے، مستعدی اور خطے میں امن، استحکام اور سلامتی برقرار رکھنے کے لیے ان کی ثابت قدم کوششوں کی بھی تعریف کی۔
