ایجنسیاں
نئی دہلی؍۲۴ جون
ٹاٹا گروپ کی فضائی کمپنی ایئر انڈیا کا ایک طیارہ پیر کی شب غلطی سے کچھ دیر کے لیے پاکستانی فضائی حدود میں داخل ہو گیا، تاہم اس کا احساس ہوتے ہی طیارے کو فوراً واپس ہندوستانی حدود کی جانب موڑ دیا گیا۔
ایئر انڈیا کے ترجمان نے ایک بیان میں بتایا کہ۲۲ جون کو پرواز نمبر AI-479 دہلی سے امرتسر پہنچی تھی۔ لینڈنگ سے قبل فضائی ٹریفک کی وجہ سے طیارے کو اطراف کے علاقے میں چکر لگانے کی ہدایت دی گئی تھی۔ اسی دوران طیارہ مختصر وقت کے لیے پاکستانی فضائی حدود میں داخل ہو گیا۔
ذرائع کے مطابق اس وقت امرتسر ہوائی اڈے پر فضائی آمد و رفت کافی زیادہ تھی، جس کے باعث لینڈنگ کے منتظر تمام طیاروں کو’ہولڈ‘ کرنے کے لیے کہا گیا تھا۔ ایسی صورتحال میں طیارے مخصوص فضائی حدود میں چکر لگاتے رہتے ہیں۔ عملے کو جب معلوم ہوا کہ طیارہ پاکستانی فضائی حدود میں داخل ہو چکا ہے تو اسے فوراً واپس ہندوستانی فضائی حدود کی طرف موڑ دیا گیا۔
ذرائع نے بتایا کہ امرتسر ہوائی اڈہ پاکستان کی سرحد کے انتہائی قریب واقع ہے، اس لیے بعض اوقات غیر ارادی طور پر اس نوعیت کے واقعات پیش آ جاتے ہیں۔
ایئر انڈیا کے ترجمان نے کہا کہ اس واقعے کی اطلاع متعلقہ ضابطہ ساز اداروں کو دے دی گئی ہے اور کمپنی نے داخلی سطح پر بھی تحقیقات شروع کر دی ہے۔ انہوں نے کہا کہ مسافروں اور عملے کی سلامتی ایئر انڈیا کی اولین ترجیح ہے۔
قابلِ ذکر ہے کہ ہندوستان اور پاکستان نے ایک دوسرے کی فضائی کمپنیوں کے لیے اپنی فضائی حدود بند کر رکھی ہیں۔ اس کے باوجود خراب موسم یا ہنگامی حالات میں دونوں ممالک بعض اوقات خصوصی اجازت دیتے رہے ہیں۔ رواں ماہ فلائی جناح کی ایک پرواز اور مئی میں پاکستان انٹرنیشنل ایئرلائنز (پی آئی اے) کی ایک پرواز کو ہندوستانی فضائی حدود میں داخل ہونے کی اجازت دی گئی تھی۔
