سرینگر؍۲۶ جون
بھارتی فوج کے سربراہ جنرل اُپیندر دویدی نے جمعہ کے روز لیہہ میں اپنے دورۂ لداخ کے دوران لداخ کے لیفٹیننٹ گورنر ونئی کمار سکسینہ سے راج نواس میں ملاقات کی۔
لداخ کا یہ دورہ ایسے وقت میں کیا گیا ہے جب فوج سرحدی لحاظ سے انتہائی اہم خطے میں آپریشنل تیاری کو برقرار رکھنے اور سول انتظامیہ کے ساتھ قریبی ہم آہنگی کو مزید مضبوط بنانے پر خصوصی توجہ مرکوز کیے ہوئے ہے۔
لیفٹیننٹ گورنر لداخ نے سماجی رابطے کی ویب سائٹ ایکس پر ملاقات کی تفصیلات شیئر کرتے ہوئے بتایا کہ اس موقع پر سول اور فوجی تعاون کو مزید مستحکم بنانے، مرکز کے زیر انتظام علاقے کی انتظامیہ اور مسلح افواج کے درمیان قریبی رابطے کو فروغ دینے، امن، استحکام اور ترقی کے لیے مشترکہ اقدامات کو آگے بڑھانے پر تبادلۂ خیال کیا گیا۔
انہوں نے اپنی پوسٹ میں کہا’’ہم نے سول-فوجی تعاون کو مضبوط بنانے، انتظامیہ اور مسلح افواج کے درمیان قریبی رابطے کو فروغ دینے، یونین ٹیریٹری انتظامیہ میں اگنی ویروں کی دوبارہ تقرری اور خطے میں امن، استحکام اور ترقی کے لیے اجتماعی کوششوں کو آگے بڑھانے پر تبادلۂ خیال کیا‘‘۔
واضح رہے کہ جنرل اُپیندر دویدی نے جون۲۰۲۴ میں بھارتی فوج کے سربراہ کا عہدہ سنبھالا تھا اور وہ۳۰ جون۲۰۲۶کو اپنی مدتِ ملازمت مکمل کریں گے۔
