۳۷۰ کی منسوخی کے بعد مودی کا جموں کشمیر کا پہلا دورہ

نئی دہلی//
وزیر اعظم نریندر مودی اتوار کو جموں و کشمیر کا دورہ کریں گے اوروہاں یوم قومی پنچایتی راج پر سانبا ضلع کی پلی گرام پنچایت سے ملک کی تمام گرام سبھا سے خطاب کرنے کے ساتھ ہی۲۰ہزار کروڑ روپے کے مختلف پروجیکٹوں کا سنگ بنیاد بھی رکھیں گے ۔
اگست۲۰۱۹میں آئین کے آرٹیکل۳۷۰؍اور۳۵؍اے کو غیر فعال کرنے کے بعد مسٹر مودی پہلی بار جموں و کشمیر کا دورہ کر رہے ہیں۔ لیفٹیننٹ گورنر منوج سنہا ان کا استقبال کریں گے ۔ وزیر اعظم۴۵ء۸کلومیٹر طویل بانہال قاضی گنڈ روڈ سرنگ کا افتتاح کریں گے ، جس سے جموں اور سری نگر کے درمیان فاصلہ۱۶کلومیٹر کم ہو جائے گا اور سفر میں تقریباً ڈیڑھ گھنٹے کی بچت ہو گی۔ آنے اور جانے کیلئے دودو سرنگوں والی یہ سڑک سال کے بارہ مہینے ٹریفک کے لیے کھلی رہے گی۔
وزیر اعظم پورے ملک میں آبی ذخائر کی بحالی کے لیے ایک نئی اسکیم امرت سروور کا بھی آغاز کریں گے ۔ اس کے تحت ملک کے ہر ضلع میں۷۵آبی ذخائر کی بحالی اور ترقی کی جائے گی۔ اسے آزادی کے امرت مہوتسو کے موقع پر شروع ہونے والے پروگراموں کے ایک حصے کے طور پر شروع کیا جائے گا۔
اس کے علاوہ وزیر اعظم دہلی سے امرتسر جموں کٹرہ ایکسپریس وے کا بھی سنگ بنیاد رکھیں گے ۔ ساڑھے سات ہزار کروڑ روپے کے اس پروجیکٹ میں چار اور چھ لین ایکسیس کنٹرول ایکسپریس وے ہوگا جو کہ مرکز کے زیر انتظام علاقے میں شاہراہ ۴۴پر بالسوا سے براستہ گڈھا بیلداران، ہیرا نگر، جاکھ، وجے پور، کنجوانی تک ہوگا اور اس سے جموں ہوائی اڈے سے کنیکٹویٹی آسان ہو جائے گی۔
وزیر اعظم راتلے اور کوار پن بجلی منصوبوں کا سنگ بنیاد رکھیں گے ۔۸۵۰میگاواٹ کا راتلے پروجیکٹ کشتواڑ ضلع میں دریائے چناب پر۵۳۰۰کروڑ روپے کی لاگت سے بنایا جا رہا ہے ۔۵۴۰میگاواٹ کا کوار پروجیکٹ بھی کشتواڑ ضلع میں دریائے چناب پر۴۵۰۰کروڑ روپے کی سرمایہ کاری سے بنایا جائے گا۔ ان دونوں منصوبوں کی تکمیل سے علاقے کی بجلی کی ضرورت پوری ہو جائے گی۔
جموں و کشمیر جن او شدھی مراکز کی توسیع کرتے ہوئے ، ایسے۱۰۰مراکز بنائے گئے ہیں، وزیر اعظم ان مراکز کا افتتاح کریں گے جو مرکز کے زیر انتظام علاقوں کے دور دراز علاقوں میں واقع ہیں۔ مسٹر مودی پلی گاؤں میں۵۰۰کلو واٹ کے سولر پاور پلانٹ کا افتتاح کریں گے ۔ پلی ملک کی پہلی پنچایت ہوگی جو کاربن نیوٹرل ہوگی۔
وزیر اعظم اونر شپ کارڈ اسکیم سے فائدہ اٹھانے والوں کو کارڈ حوالے کریں گے ۔ وہ یوم قومی پنچایتی راج پر مختلف زمروں میں ایوارڈ جیتنے والی پنچایتوں کو مختص فنڈز منتقل کریں گے ۔ مودی علاقے میں دیہی ورثے کی نمائش کرنے والی انٹیک فوٹو گیلری اور نوکیا اسمارٹ پور کا بھی دورہ کریں گے ۔ نوکیا اسمارٹ پور ایک دیہی انٹرپرینیورشپ والا ماڈل ہے تاکہ آدرش ا سمارٹ گاوں کے وژن کو ظاہر کیا جاسکے ۔