سوشل میڈیا پلیٹ فارموں کا غلط استعمال‘وادی میں ایس آئی اے کے چھاپے

سرینگر//
جموں وکشمیر پولیس کی سٹیٹ انوسٹی گیشن ایجنسی (ایس آئی اے) کشمیر نے منگل کی صبح وادی کشمیر کے۴؍اضلاع میں مختلف مقامات پر چھاپے مارے ۔
یہ چھاپے سوشل میڈیا پلیٹ فارموں کے غلط استعمال کے سلسلے میں درج ایک کیس کے تحت مارے گئے ۔
ایجنسی کے ایک ترجمان نے اپنے ایک بیان میں کہا کہ ایس آئی اے کشمیر نے منگل کے روز کپوارہ، اننت ناگ، پلوامہ اور سرینگر میں۶مقامات پر چھاپے مارے ۔
ترجمان نے کہا کہ پولیس اسٹیشن ایس آئی اے / سی آئی کے میں سوشل میڈیا کے غلط استعمال جیسے غیر قانونی و علیحدگی پسند سرگرمیاں انجام دینے کے سلسلے میں درج ایک کیس زیر نمبر۲۰۲۳/۵میں جاری تحقیقات کے تحت یہ چھاپے مارے گئے ۔
بیان میں کہا گیا’’یہ کیس ایس آئی اے نے ہندوستان میں قائم سوشل میڈیا اداروں کے خلاف درج کیا تھا جو غیر ملکی اداروں کے ساتھ مل کر ہندوستان کے خلاف نفرت پھیلا رہے ہیں اور دہشت گردی کی سرگرمیوں کو فروغ دے رہے ہیں‘‘۔
ترجمان نے اپنے بیان میں کہا کہ ایس آئی اے اہلکاروں کی طرف سے علی الصبح تلاشی کارروائیاں انجام دینے کا مقصد سوشل میڈیا پلیٹ فارموں کی وساطت سے علیحد گی پسندی اور بھارت مخالف جذبات کو پھیلانے میں ملوث افراد اور گرہوں کو بے نقاب کرنا تھا۔
بیان میں کہا گیا’’شناخت شدہ اداروں پر شک ہے کہ وہ اپنے مذموم ایجنڈے کو آگے بڑھانے کے لئے غیر ملکی ساتھیوں کے ساتھ مل کر کام کر رہے ہیں جس میں دہشت گردی کی کارروائیوں کو اکسانا اور ان کی حمایت کرنا شامل ہے ‘‘۔
بیان کے مطابق علاوہ ازیں یہ ادارے سرکاری ملازموں کا نشانہ بنا کر ان کے قانونی فرائض کی انجام دہی میں رکاوٹیں ڈال رہے ہیں۔
ایجنسی کے بیان میں مزید کہا گیا’’تلاشیوں کے دوران کافی ڈیجیٹل اور جسمانی شواہد جیسے موبائل فونز، سم کارڈز وغیرہ ضبط کئے گئے ان شواہد کا ملزم افراد اور اداروں کے خلاف ایک مضبوط مقدمہ بنانے کیلئے باریک بینی سے تجزیہ کیا جائے گا جس کے بعد قانونی کارروائی کو یقینی بنایا جائے گا۔‘‘