عمر عبداللہ کا لوک سبھا انتخابات میں بی جے پی مخالف اتحاد سے دور رہنے کا اشارہ

جموں//
سابق وزیر اعلیٰ ‘عمر عبداللہ نے ہفتہ کو نیشنل کانفرنس کو اگلے سال ہونے والے عام انتخابات میں بی جے پی کے خلاف عظیم اتحاد سے دور رکھنے کا اشارہ دیتے ہوئے کہا کہ دفعہ ۳۷۰ کی منسوخی کے وقت ایسی زیادہ تر پارٹیاں خاموش رہیں۔
عمر عبداللہ نے جموں کشمیر میں کسی سیاسی جماعت کے ساتھ اسمبلی انتخابات کیلئے گٹھ جوڑ کو قبل از وقت قرار دیا۔
نیشنل کانفرنس کے نائب صدر نے سرحدی ضلع راجوری پہنچنے پر نامہ نگاروں کو بتایا’’جموں و کشمیر سے باہر ہمارے پاس کیا ہے؟ ہمارے پاس کل پانچ (لوک سبھا) سیٹیں ہیں اور یہ سیٹیں کیا طوفان کھڑا کر سکتی ہیں؟ ہمیں ان سیٹوں پر بی جے پی کے خلاف لڑنا ہے اور جموں و کشمیر سے باہر کیا ہو رہا ہے یہ ایک ثانوی سوال ہے‘‘۔
سابق وزیر اعلیٰ۲۰۲۴ کے لوک سبھا انتخابات سے پہلے نیشنل کانفرنس کے بی جے پی کے خلاف دیگر جماعتوں کے ساتھ ہاتھ ملانے کے امکان سے متعلق ایک سوال کا جواب دے رہے تھے۔
عمرعبداللہ کاکہنا تھا’’مجبوریاں ایک طرف، مجھے پارٹی اور جموں و کشمیر کے لیے اس طرح کے اتحاد سے کوئی فائدہ نظر نہیں آتا۔ میں بار بار کہہ رہا ہوں کہ جب انہیں ہماری ضرورت ہوتی ہے تو وہ ہمارے دروازے پر دستک دیتے ہیں۔ جب (دہلی کے وزیر اعلیٰ اروند) کیجریوال مشکل میں ہوتے ہیں تو انہیں ہماری حمایت کی ضرورت ہوتی ہے لیکن۲۰۱۹ میں یہ رہنما کہاں تھے جب ہمیں ایک بڑے دھوکے کا سامنا کرنا پڑا۔‘‘ انہوں نے آرٹیکل۳۷۰ کی منسوخی اور جموں و کشمیر کو مرکز کے زیر انتظام علاقوں میں تقسیم کرنے کا حوالہ دیتے ہوئے کہا۔
سابق وزیر اعلیٰ نے پوچھا کہ ان میں سے کون جموں و کشمیر کے لوگوں کے ساتھ کھڑا ہے۔
ان کاکہنا تھا’’کہاں تھے وہ لوگ جو آج آئین اور جمہوریت کے تحفظ کے لیے شور مچا رہے ہیں جب ہم نے جمہوریت کے قتل کا سامنا کیا تھا۔ انہوں نے اس کے خلاف کوئی بات نہیں کی اور اس معاملے کی حقیقت یہ ہے کہ انہوں نے (پارلیمنٹ میں) اس اقدام کی حمایت کی‘‘۔
تاہم، انہوں نے کہا کہ صرف چار پارٹیاں ہیں ڈی ایم کے، ممتا بنرجی کی قیادت والی ٹی ایم سی اور دو بائیں بازو کی جماعتیں ‘جو ہمیشہ جموں و کشمیر کے لوگوں کے ساتھ کھڑی ہیں۔
نینشل کانفرنس کے نائب صدر نے کہا’’ان پارٹیوں کو چھوڑو، مجھے دوسری پارٹیوں میں سے کوئی دکھائیں جس نے دل سے ہمارا ساتھ دیا ہو۔ ہم اپنی پانچ سیٹوں پر بی جے پی کے خلاف لڑیں گے، انہیں جو چاہیں کرنے دیں۔‘‘
جموں و کشمیر میں اسمبلی انتخابات سے قبل قبل از کسی سیاسی جماعت کے ساتھ گٹھ جوڑ کو انہوں نے قبل از وقت قرار دیا ۔انہوں نے کہا’’ انتخابات کہیں نظر نہیں آتے‘‘۔انہوں نے کہا’’انتخابی بگل بجنے دو، ہم اس پر ایک ساتھ بیٹھیں گے۔ کسی ایک شخص کی رائے یا فیصلہ قابل قبول نہیں ہے، پارٹی (این سی) کے تمام رہنما اس مسئلے پر بات کریں گے، اس کے فوائد اور نقصانات کو تولیں گے اور اتفاق رائے تک پہنچیں گے‘‘۔
سابق وزیر اعلیٰ نے کہا کہ بگل ابھی اس شخص تک نہیں پہنچا ہے جو اسے بجانے والا ہے اور اس طرح کے سوالات سے کچھ فائدہ نہیں ہوتا۔
عمرعبداللہ نے کہا کہ وہ جموں و کشمیر میں اسمبلی انتخابات کے انعقاد میں تاخیر کے بارے میں سوالوں کے جواب دے کر تھک چکے ہیں۔ انہوں نے دعویٰ کیا کہ ’’یہ ظاہر ہے کہ بی جے پی تیار نہیں ہے اور اگر وہ تیار ہوتی تو انتخابات ہو چکے ہوتے‘‘۔
این سی کے نائب صدر نے کہا’’الیکشن کمشنر نے خود کہا تھا کہ (سکیورٹی) کی صورتحال کے بارے میں وزارت داخلہ سے معلومات حاصل کرنے کے بعد، وہ انتخابات کی تاریخوں کا اعلان کر سکتے ہیں۔ شاید انہیں ابھی تک معلومات نہیں ملی ہیں، جو سمجھ میں نہیں آتی‘‘۔ انہوں نے کہا، چیف الیکشن کمشنر نے اعتراف کیا کہ جموں و کشمیر میں ایک خلا ہے۔ ’’کیوں نہیں بھرا جا رہا‘‘؟
عمرعبداللہ‘جنہوں نے کچھ دیر پہلے نوشہرہ میں اپنی آخری سانس لینے والے پارٹی کے ساتھی کے اہل خانہ سے اظہار تعزیت کے لیے راجوری پہنچنے کے لیے مغل روڈ کا استعمال کیا، کہا کہ انتظامیہ کی کوششیں عوام کی تکالیف کو کم کرنے اور بڑھتی ہوئی عسکریت پسندی پر قابو پانے کیلئے ہونی چاہیے۔
سابق وزیر اعلیٰ نے کہا’’بدقسمتی سے، گورنر راج کے تحت انتظامیہ اور عوام کے درمیان فاصلہ ہے۔ ایک منتخب حکومت ہمیشہ نامزد حکومت سے بہتر ہوتی ہے‘‘۔ این سی لیڈر نے الزام لگایا ’’لوگوں کو تکلیف ہوتی ہے کیونکہ انتظامیہ کم سے کم اس بات کی فکر کرتی ہے کہ ان کے مسائل پر توجہ دی جاتی ہے یا نہیں‘‘۔
مغل روڈ پر سیکورٹی چیک پوائنٹس پر لمبی قطاروں کی وجہ سے مسافروں کو پریشانی کا سامنا کرنے والے ایک سوال پر، انہوں نے کہا کہ راجوری اور پونچھ کے جڑواں سرحدی اضلاع میں حالیہ دہشت گردی کے واقعات خطے میں بڑھتی ہوئی عسکریت پسندی کی نشاندہی کرتے ہیں۔
سابق وزیر اعلیٰ’’اگر مسافروں کو دشواری کا سامنا ہے تو یہ اس بات کا ثبوت ہے کہ انتظامیہ ناکام ہو چکی ہے اور سیکورٹی کی صورتحال بہتر ہونے کے بجائے مزید خراب ہو گئی ہے۔ عوام کو ایسے مسائل کا سامنا ہے جو پہلے نہیں تھے‘‘۔
نریندر مودی حکومت کے گزشتہ نو سالوں کے دوران جموں و کشمیر میں بے مثال ترقی کے بی جے پی کے دعوے پر، انہوں نے کہا کہ انتخابات کے بعد’سب کچھ معلوم ہو جائے گا۔‘‘ (ایجنسیاں)