سرینگر//
چیف سکریٹری‘ڈاکٹر ارون کمار مہتا نے آج سرینگر اسمارٹ سٹی لمیٹڈ (ایس ایس سی ایل) کے افسران بشمول ضلعی اور ڈویڑنل انتظامیہ پر زور دیا کہ وہ ان تمام سائٹس پر ضروری وسائل میں اضافہ کریں جہاں کام جاری ہے تاکہ تمام شناخت شدہ کام اس مہینے کے وسط تک مکمل ہوسکیں۔
ڈاکٹر مہتا نے ایس ایس سی ایل کے تحت چل رہے کاموں کا جائزہ لیتے ہوئے ایگزیکیوٹنگ ایجنسیوں پر زور دیا کہ وہ وقت کا بھرپور استعمال کریں اور پروجیکٹوں کو کامیابی کے ساتھ وقت پر مکمل کرنے کیلئے دوہری شفٹوں میں کام جاری رکھیں۔
ڈاکٹر مہتانے ان سے کہا کہ آنے والے ہفتے کے موسم کی رپورٹیں دیکھیں تاکہ اس سے بہترین فائدہ اٹھایا جا سکے۔ یہاں تک کہ انہوں نے انہیں سائٹوں پر کام کرنے والے مزدوروں کو ضروری سہولیات فراہم کرنے کا مشورہ دیا تاکہ وہ خراب موسمی حالات میں کام کرنے کے قابل ہوں۔
چیف سکریٹری نے ایگزیکیوٹنگ ایجنسیوں پر زور دیا کہ وہ کام کو معیاری کام اور ان کی بروقت تکمیل کیلئے چوبیس گھنٹے نگرانی کریں۔ انہوں نے ان سے کہا کہ وہ لوگوں کی آسانی کے لیے تمام مکمل شدہ جگہوں سے ملبہ ہٹائیں اور انہیں جلد از جلد عوام کیلئے وقف کرنے کی تیاری کریں۔