سرینگر//
حج ۲۰۲۳ کیلئے عازمین کی روانگی اور واپسی کا عبوری فلائٹ شیڈول مرتب کیا گیا ہے۔
دئیے گئے عبوری شیڈول کے مطابق جموں وکشمیر اور لداخ سے تعلق رکھنے والے عازمین سرینگر کے بین الاقوامی ہوائی اڈے سے خصوصی پروازوں کے ذریعے مدینہ منورہ روانہ ہوں گے اور یہ روانگی ۲۱مئی سے ۶جون تک جاری رہے گی۔ جبکہ جموں وکشمیر اور لداخ یونین ٹیریٹریز کے حجاج کرام کی واپسی کا سلسلہ۳جولائی سے۲؍ اگست ۲۰۲۳ تک جاری رہے گا۔
رواں برس حج بیت اللہ کے لیے بھارت کے ایک لاکھ ۳۸ ہزار سے زائد عازمین فریضہ حج انجام دینے جا رہے ہیں جن میں جموں وکشمیر سے تعلق رکھنے والے ۱۱ ہزار۵ سو عازمین بھی شامل ہیں۔
ملک کے مختلف شہروں میں واقع ہوائی اڈوں سے عازمین کی مدینہ منورہ کی روانگی کا سلسلہ رواں ماہ ۲۱ مئی سے شروع ہوگا جو۲۲ جون ۲۰۲۳ تک جاری رہے گا۔ وہیں شیڈول کے مطابق واپسی کیلئے فلائٹس۳جولائی سے شروع ہونگی اور یہ سلسلہ۲؍اگست ۲۰۲۳ تک جاری رہے گا۔
واضح رہے کہ جموں وکشمیر حج کمیٹی نے رواں برس حج بیت اللہ کے لیے منتخب ہونے والے عازمین کو سعودی ریال فرام کرنے کے عمل کو ختم کر دیا ہے۔ ایسے میں حج پر جانے والے عازمین کو وہاں روزانہ کے خرچے کی خاطر استعمال ہونے والی مطلوبہ سعودی کرنسی (سعودی ریال) کا بندوبست روانگی سے قبل از خود کرنا ہوگا۔
جموں وکشمیر حج کمیٹی کی جانب سے منتخب عازمین کو روانہ ہونے سے قبل۲۱۰۰ سعودی ریال خرچے کیلئے فراہم کئے جاتے تھے، لیکن اب اس سال سے یہ سلسلہ ختم کر دیا گیا ہے۔