’دہشت گردی کو ہوا دینے والوں کا احتساب ضروری‘

نئی دہلی//
وزیر دفاع‘راج ناتھ سنگھ نے شنگھائی تعاون تنظیم (ایس سی او) کے رکن ممالک پر زور دیا ہے کہ وہ دہشت گردی کو اس کی تمام شکلوں میں جڑ سے اکھاڑ پھینکنے کیلئے مل کر کام کریں اور اس کی حمایت کرنے والوں کو جوابدہ بنانے کی ضرورت ہے ۔
جمعہ کو یہاں شنگھائی تعاون تنظیم کے رکن ممالک کے وزرائے دفاع کی میٹنگ کی صدارت کرتے ہوئے سنگھ نے زور دے کر کہا کہ کسی بھی قسم کی دہشت گردی یا کسی بھی قسم کی دہشت گردی کی حمایت انسانیت کے خلاف ایک سنگین جرم ہے ۔ انہوں نے کہا کہ دہشت گردی اور امن و خوشحالی ایک ساتھ نہیں رہ سکتے ۔
وزیر دفاع نے کسی ملک کا نام لیے بغیر کہا کہ اگر کوئی ملک دہشت گردوں کی حمایت کرتا ہے تو وہ نہ صرف دوسروں کیلئے خطرہ پیدا کرتا ہے بلکہ اپنے لیے بھی خطرہ پیدا کرتا ہے ۔
سنگھ نے کہا کہ نوجوانوں کی بنیاد پرستی نہ صرف سلامتی کے نقطہ نظر سے تشویشناک ہے بلکہ یہ معاشرے کی سماجی و اقتصادی ترقی کی راہ میں ایک بڑی رکاوٹ بھی ہے ۔
وزیر دفاع نے کہا کہ اگر ہم شنگھائی تعاون تنظیم کو ایک مضبوط اور قابل اعتماد بین الاقوامی ادارہ بنانا چاہتے ہیں تو ہماری پہلی ترجیح دہشت گردی سے موثر انداز میں نمٹنا ہونی چاہئے ۔
سنگھ کاکہناتھا’’ہندوستان اقوام متحدہ کے چارٹر کی دفعات کی بنیاد پر امن اور سلامتی کو برقرار رکھنے میں یقین رکھتا ہے ۔ انہوں نے کہا کہ تمام رکن ممالک کو زیادہ سے زیادہ فوائد کیلئے تعاون کی کوششیں بڑھانا ہوں گی‘‘۔
وزیردفاع نے کہا کہ ایک محفوظ‘مستحکم اور خوشحال خطہ تمام ممالک کے لوگوں کامعیار زندگی بہتر بنائیگا۔انہوں نے کہا کہ وزیر اعظم نریندر مودی کا ’سکیور‘وژن خطے کی کثیر جہتی بہبود کے تئیںہندوستان کے عزم کی عکاسی کرتا ہے ۔
سنگھ نے کہا کہ ہندوستان مشترکہ سلامتی کے مفادات کو مدنظر رکھتے ہوئے ایس سی او کے رکن ممالک کی دفاعی صلاحیت کو بڑھانے کیلئے پرعزم ہے ۔