میڈرڈ// ہندوستان کے تجربہ کار شٹلر کدامبی سری کانت نے بدھ کو اسپین ماسٹرز سپر 300 ایونٹ کا پہلا مرحلہ جیت لیا جبکہ ساتوک سائراج رنکی ریڈی اور چراغ شیٹی کی مردوں کی ڈبلز جوڑی کو پہلے راؤنڈ کا میچ بیچ میں ہی چھوڑنے کے بعد ٹورنامنٹ سے باہر ہونا پڑا۔
کدامبی نے ایک گھنٹہ پانچ منٹ تک جاری رہنے والے دلچسپ مردوں کے سنگلز مقابلے میں تھائی لینڈ کے سیتھیکام تھماسین کو 21-11، 25-27، 23-21 سے مات دی۔ تھماسین کے خلاف چار میچوں میں کدامبی کی یہ چوتھی جیت تھی۔ دوسرے مرحلے میں کدامبی کا مقابلہ ہم وطن سائی پرنیت یا جمہوریہ چیک کے جین لاؤڈا سے ہوگا۔
گزشتہ ہفتے سوئس اوپن جیتنے والی ساتوک-چراغ کی جوڑی جاپان کے آیاتو اینڈو اور یوتا تاکئی کے خلاف 9-11 سے پیچھے تھے جب انہوں نے میچ چھوڑنے کا فیصلہ کیا۔ ٹورنامنٹ سے اس جوڑی کے باہر ہونے کی وجہ کی باضابطہ طور پر تصدیق نہیں ہوئی ہے، حالانکہ ساتوک کو کورٹ سے نکلنے سے قبل میچ آفیشلز کو اپنی بائیں ٹانگ دکھاتے ہوئے دیکھا گیا تھا۔
واضح رہے کہ ساتوک کو جنوری میں گروئن انجری کا سامنا کرنا پڑا تھا جس کی وجہ سے اس جوڑی کو گھریلو سرزمین پر منعقد ہونے والے انڈیا اوپن 750 ٹورنامنٹ سے باہر ہونا پڑا تھا۔
دریں اثنا، ہندوستان کی آکرشی کشیپ نے خواتین کے سنگلز کے پہلے مرحلے میں کناڈا کی مشیل لی کو شکست دی۔ کناڈا کی چھٹی سیڈ نے پہلا گیم 21-12 سے جیتا تھا لیکن آکرشی نے اگلے دو گیمز 21-15، 21-18 سے جیت کر دوسرے مرحلے میں قدم رکھا۔
تریشا جولی اور گایتری گوپی چند کی ہندوستانی جوڑی کو تاہم خواتین کے ڈبلز میں پہلے مرحلے میں شکست کا سامنا کرنا پڑا۔ جاپان کے رین میورا اور آیاکو ساکوراموٹو نے تریشا گایتری کو 39 منٹ میں 21-18، 21-16 سے شکست دی۔