ٹنگڈار میں ایل او سی پردراندازی کی کوشش ‘ ایک درانداز ہلاک

سری نگر//
شمالی کشمیر کے کپواڑہ ضلع میںٹنگڈارکے ایل او سی پر جبدی علاقے میں جمعہ کو سیکورٹی فورسز کی طرف سے دراندازی کی کوشش کو ناکام بنانے کے بعد ایک نامعلوم دراندازی کو ہلاک کر دیا گیا۔
سرکاری ذرائع کے حوالے سے ایک مقامی خبر رساں ایجنسی‘ جی این ایس نے اطلاع دی ہے کہ سیکورٹی فورسز نے ٹنگڈار کے جبدی علاقے کے قریب مشتبہ نقل و حرکت کا پتہ لگایا۔
تلاشی کے دوران فائرنگ کے تبادلے کے دوران ایک درانداز مارا گیا۔جب یہ رپورٹ درج کی جا رہی تھی اس وقت علاقے میں تلاشی جاری ہے۔
قابل ذکر ہے کہ جموں وکشمیر پولیس کے ڈائریکٹر جنرل (ڈی جی پی)دلباغ سنگھ نے جمعرات کوکہاتھاکہ سرحدوں پر سیکورٹی گرڈ کو مستحکم کرنے کی خاطر مزید چوکیاں قائم کی جارہی ہیں۔
پولیس سربراہ کا کہنا تھاکہ امسال کچھ ملی ٹینٹوں دراندازی کے ذریعے اس طرف آنے میں کامیاب ہوئے ہیں۔دلباغ نے کہاکہ ۶۵؍ایسے غیر ملکی ملی ٹینٹ جو یہاں دراندازی کے ذریعے آئے ہوئے تھے ان کا لگ بھگ صفایا کیا گیا تاہم ابھی بھی کچھ بچے ہوئے ہیں۔
ڈی جی پی نے کہاکہ ہمسایہ ملک دہشت گردوں کو تربیت دے کر اس طرف دھکیلنے کی لگاتار کوششوں میں مصروف ہے۔انہوں نے بتایا کہ ہمسایہ ملک کو جموںکشمیر کا امن راس ہی نہیں آرہا ہے اور وہ یہاں پر ملی ٹینٹوں کو دھکیل کر حالات کو درہم برہم کرنے کی کوششو ں میں لگا ہوا ہے۔
سرحدوں کی سیکورٹی کے بارے میں پوچھے گئے سوال کے جواب میں پولیس سربراہ نے کہاکہ لائن آف کنٹرول پر سیکورٹی گرڈ کافی مضبوط ہے اور مزید مضبوطی کی خاطر نئی چوکیاں قائم کی جارہی ہیں۔