یو اے پی اے کے تحت۲۰۲۰ سے اب تک۲۳؍ افراد کو دہشت گرد نامزد کیا گیا ہے:مرکز

سرینگر//
مرکزی وزارت داخلہ نے منگل کو کہا کہ۲۰۲۲ سے اب تک ۲۳؍افراد کو غیر قانونی سرگرمیاں (روک تھام) ایکٹ (یو اے پی اے) کے تحت دہشت گرد نامزد کیا گیا ہے۔
وزیر مملکت برائے داخلہ نتیانند رائے نے لوک سبھا میں ایک جواب میں کہا کہ یو اے پی اے ۱۹۶۷ کے تحت ۲۳؍ افراد کو دہشت گرد نامزد کیا گیا ہے اور ان کے نام فورتھ شیڈول میں شامل کیے گئے ہیں۔
رائے نے کہا کہ۲۳ نامزد دہشت گردوں میں سے ۳کا تعلق جیش محمد ‘ ۵ کا لشکر طوبیہ اور ۶کا حزب المجاہدین تنظیم سے ہے۔
لشکر طیبہ کے دہشت گردوں میں حافظ طلحہ بیج، شیخ سجاد عرف سجاد گل، حبیب اللہ ملک، محمد امین خبیب اور ارباز احمد میر شامل ہیں۔جیش محمد سے وابستہ افراد میں محی الدین اورنگزیب عالمگیر، عاشق حسین نینگرو اور علی کاشف جان شامل ہیں۔حزب المجاہدین سے وابستہ افراد میں امتیاز احمد کنڈو، شوکت احمد شیخ، باسط احمد ریشی، بشیر احمد پیر عرف امتیاز عالم، ارشاد احمد عرف ادریس اور ڈاکٹرآصف مقبول ڈار شامل ہیں۔
دیگر تنظیموں سے تعلق رکھنے والوں میں العمر المجاہدین/جے کے ایل ایف کے مشتاق احمد زرگر عرف لٹرم، البدر کے ارجمند گلزار ڈار، تحریک المجاہدین کے نفیق نائی عرف سلطان، حرکت الجہاداسلامی کے ظفر اقبال عرف سلیم شامل ہیں۔ جے کے آئی ایف کے بلال احمد بیگ بابر، طارق المجاہدین کے شیخ جمیل الرحمٰن، القاعدہ کے اعجاز احمد آہنگر، خالصتان ٹائیگر فورس کے ارشدیپ سنگھ گل عرف عرش دلا اور بابر خالصہ انٹرنیشنل کے ہرویندر سنگھ سندھوشامل ہیں۔