سری نگر//
اننت ناگ اور پلوامہ اضلاع کو ہندوستان کے ٹی بی کے خاتمے کے لیے ذیلی قومی سرٹیفیکیشن کے تحت تپ دق سے پاک قرار دیا گیا ہے۔
حکام نے منگل کو یہاں کہاسرینگر کو اس حوالے سے گولڈ میڈل ملا ہے ۔
ریاستی تپ دق کے افسر‘ ڈاکٹر ادفر قادری نے بتایا کہ دو مزید اضلاع‘ اننت ناگ اور پلوامہ کو ٹی بی سے پاک قرار دیا گیا ہے۔انہوں نے کہا کہ سرینگر کو طلائی تمغہ ملا ہے جبکہ یو ٹی کو کانسی کا تمغہ ملا ہے اور بیشتر دیگر اضلاع نے حالت برقرار رکھی ہے۔
ڈاکٹر ادفر نے کہا ’’اب ہمیں تین اضلاع میں ٹی بی تھری کا اعزاز حاصل ہے کیونکہ بڈگام کو۲۰۲۱میں ٹی بی سے پاک قرار دیا گیا تھا‘‘۔انہوں نے مزید کہا کہ پچھلے سال کشمیر کو ۳گولڈ میڈل ملے تھے اور اب وہ اپ گریڈ ہو گئے ہیں اور پلوامہ اور اننت ناگ کو ٹی بی سے پاک قرار دیا گیا ہے۔
ٹی بی افسر کاکہنا تھا’’کشمیر میں ٹی بی کے واقعات میں کمی آرہی ہے۔ ہم ۲۰۲۵ تک ٹی بی کے خاتمے کو حاصل کر لیں گے کیونکہ ہم تیز اور فعال کیسوں کی تلاش اور کیس اسکریننگ کر رہے ہیں‘‘۔
قابل ذکر ہے کہ کیس کے اہداف میں کمی کے حصول میں شناخت کی۴قسمیں ہیں جن میں سرفہرست مقام ٹی بی سے پاک حیثیت کا ہے یعنی ۸۰فیصد کمی۔دیگر زمروں میں گولڈ میڈل کیٹیگری (۶۰ فیصدسے زیادہ کمی)، سلور میڈل کیٹیگری (۴۰فیصد سے زیادہ کمی) اور برانز میڈل کیٹیگری (۲۰فیصدسے زیادہ کمی) شامل ہیں۔
بڈگام پہلا ضلع تھا جسے ٹی بی سے پاک قرار دیا گیا تھا۔ ذیلی قومی سرٹیفیکیشن اضلاع، ریاستوں اور مرکز کے زیر انتظام علاقوں کی تپ دق سے پاک حیثیت کی طرف پیش رفت کو نشان زد کرنے کی ایک پہل ہے، جسے ۲۰۲۵ تک ٹی بی سے پاک ہندوستان کے ہدف کو حاصل کرنے کیلئے ۲۰۲۰ میں شروع کیا گیا تھا۔